Ministri Nufi: 50 efektivë dhe 2 helikopterë në Dajt, vijojnë operacionet në Mirditë dhe Pukë

Forcat e Armatosura vijojnë të jenë të angazhuara në operacionet për shuarjen dhe vënien nën kontroll të zjarreve në disa zona të vendit. Sipas ministrit të Mbrojtjes, Ermal Nufi, në malin e Dajtit, në Tiranë, operacioni po vijon me pjesëmarrjen e 50 efektivëve të FA dhe dy helikopterëve të Forcës Ajrore. Për momentin, flakët nuk paraqesin rrezik për zonat e banuara.

Ndërkohë, në Lufaj të Mirditës, strukturat operacionale vijojnë ndërhyrjen me dy mjete zjarrfikëse dhe nëntë efektivë të Forcave të Armatosura. Edhe në këtë zonë, situata nuk përbën kërcënim për banesat.

Operacionet po vijojnë gjithashtu në Fushë-Lajë të Pukës, ku janë angazhuar 40 efektivë të FA. Edhe atje, sipas informacionit zyrtar, aktualisht nuk ka rrezik për zonat e banuara. Forcat në terren vijojnë monitorimin dhe ndërhyrjen për të mbajtur nën kontroll vatrat e zjarrit.