Ministri Nufi: Shqipëria po rrit kapacitetet e mbrojtjes, investime të reja në kuadër të angazhimeve të NATO-s

Ministri i Mbrojtjes, Ermal Nufi, deklaroi se Samiti i NATO-s në Ankara ishte një nga takimet më të rëndësishme të Aleancës në vitet e fundit, pasi vendet anëtare riafirmuan angazhimet e tyre për rritjen e kapaciteteve mbrojtëse dhe përmbushjen e detyrimeve të përbashkëta. Në një intervistë për Euronews Albania, Nufi u shpreh se samiti shënoi kalimin nga përcaktimi i objektivave në fazën e zbatimit konkret të tyre.

“Samiti i Ankarasë ishte një samit që mori angazhime shumë të forta nga të gjitha shtetet anëtare lidhur me shpenzimet ushtarake dhe përmbushjen e detyrimeve në raport me Aleancën. Ishte një samit që garantoi jo vetëm unitetin e NATO-s, por edhe vendosmërinë e saj për të qenë gjithmonë e gatshme përballë çdo situate”, tha ministri. Duke folur për konceptin “NATO 3.0”, Nufi theksoi se Aleanca ndodhet në një fazë të re zhvillimi, ku prioritet është forcimi i kapaciteteve mbrojtëse dhe përballimi i sfidave të reja të sigurisë.

Ministri deklaroi se Shqipëria po vijon punën për rritjen e shpenzimeve të mbrojtjes në përputhje me objektivat e reja të NATO-s. Sipas tij, vendi synon të arrijë nivelin e 5% të Prodhimit të Brendshëm Bruto për shpenzime të lidhura me mbrojtjen deri në vitin 2035. “Ne kemi marrë një angazhim që deri në vitin 2035 të kemi 5% të PBB-së për shpenzime të lidhura me mbrojtjen. Këto do të ndahen respektivisht në 3.5% për shpenzime specifike të mbrojtjes dhe 1.5% për shpenzime të tjera të lidhura me mbrojtjen”, deklaroi Nufi. Ai bëri të ditur se investimet do të përqendrohen në modernizimin e Forcave të Armatosura, blerjen e sistemeve të reja mbrojtëse, zhvillimin e infrastrukturës ushtarake, sigurinë kibernetike dhe mbrojtjen e infrastrukturave kritike.

Duke folur për Korridorin VIII, Nufi tha se përveç infrastrukturës civile, ai përfshin edhe një komponent ushtarak të rëndësishëm për lëvizshmërinë dhe sigurinë e Aleancës. “Pjesa e infrastrukturës ushtarake është pjesë e kapaciteteve të kërkuara nga NATO për Republikën e Shqipërisë”, tha ai, duke shtuar se parashikohen investime në sisteme antiraketore, qendra mobile dhe pajisje të nevojshme për garantimin e sigurisë.

Nufi vlerësoi gjithashtu rolin e Shqipërisë në NATO dhe theksoi se vendi ka qenë i angazhuar në përmbushjen e detyrimeve dhe në kontributet në misionet e Aleancës. “Shqipëria është vlerësuar për angazhimin e saj në NATO, për kontributin në misionet e Aleancës dhe për përpjekjet për rritjen e kapaciteteve ushtarake”, deklaroi ministri. Sipas tij, siguria e Shqipërisë bazohet në qasjen kolektive të NATO-s dhe jo në një strategji individuale. “Republika e Shqipërisë nuk ka një qasje individuale në raport me mbrojtjen, por një qasje kolektive në kuadër të NATO-s”, tha Nufi. Ai theksoi se Aleanca mbetet garancia kryesore për sigurinë e vendeve anëtare, ndërsa Shqipëria do të vijojë investimet për një forcë të armatosur moderne dhe në përputhje me standardet e NATO-s.