Ministri Nufi: S’ka më ushtarë dhe efektivë që fikin zjarret me shkurre, zjarret kanë përfshirë gjithë rajonin

Ministri i Mbrojtjes, Ermal Nufi, në një lidhje nga Lezha flet për situatën e zjarreve në vend, duke theksuar se fenomeni ka prekur të gjithë rajonin.

“Situata e zjarreve nuk është një situatë tipike e Shqipërisë. Po të shikoni online, hartat dhe satelitët e NASA-s, e kuptoni që është i gjithë rajoni, Italia, Greqia, që janë përfshirë nga flakët e zjarrit”, tha Nufi.

Ministri nënvizoi se përballimi i zjarreve kërkon ndërhyrje me mjete të posaçme, ndërsa mohoi përdorimin e mjeteve primitive nga efektivët e Forcave të Armatosura.

“Nuk besoj që ke parë sivjet asnjë ushtar të FA-ve që fikin zjarret me shkurre. Janë pajisur shumë mirë ushtarët e Forcave të Armatosura, të bazës së emergjencave civile, që kanë mjete apostafat për përballimin e zjarreve”, u shpreh ai në ”A2cnn”.

Sipas Nufit, ndërhyrja bëhet përmes zjarrfikëseve, pompave të ujit dhe hapjes së brezave mbrojtës, ndërsa kur situata e kërkon, përdoret edhe ndërhyrja nga ajri.