Ministria e Mbrojtjes për situatën e zjarreve: 45 vatra zjarri në 24 orë, 12 mbeten aktive

Ministria e Mbrojtjes informon se gjatë 24 orëve të fundit në vend janë raportuar 45 vatra zjarri, nga të cilat 12 vijojnë të jenë aktive dhe një tjetër është në monitorim.

Në operacionet për shuarjen e flakëve janë angazhuar 72 automjete zjarrfikëse dhe 839 forca operacionale, ndërsa në mbështetje të tyre janë përfshirë edhe 250 efektivë të Forcave të Armatosura, pesë helikopterë dhe dy avionë “Air Tractor” të Forcës Ajrore. Aktualisht në terren vijojnë të operojnë 167 efektivë të FA-së, tre helikopterë dhe dy avionë “Air Tractor”.

Në Dajt, pranë fabrikës së ujit Selita dhe mbi tunelet e Qafë-Mollës, vijon operacioni për shuarjen e zjarrit në pyllin me pisha. Në terren po punojnë forcat e MZSH-së dhe ADZM-së, të mbështetura nga dy helikopterë të Forcës Ajrore. Sipas autoriteteve, nuk ka rrezik për zonat e banuara.

Në Priskë të Madhe, zjarri është shtrirë në drejtim të Gurrës, Farkës dhe Lundrës. Forcat tokësore vijojnë ndërhyrjen, ndërsa operacioni po mbështetet edhe nga ajri, me synim vënien nën kontroll të situatës.

Një tjetër vatër aktive është ajo në Drenie–Lofkend–Ngracije, në zonën Patos–Mallakastër. Operacioni po vijon me forcat zjarrfikëse dhe strukturat vendore, të mbështetura nga 30 efektivë të Forcave të Armatosura dhe një autoambulancë. Në terren janë angazhuar gjithashtu tre automjete zjarrfikëse, 15 efektivë dhe 25 forca bashkiake.

Në Krujë, zjarri në lagjen Abaze mbetet aktiv dhe ndërhyrja po mbështetet nga Forcat e Armatosura dhe mjetet ajrore. Në terren ndodhen 57 efektivë të FA-së, mjete mbështetëse dhe helikopterë të Forcës Ajrore, ndërsa prioritet mbetet mbrojtja e zonave të banuara. Në Krastë dhe Halil vijojnë operacionet e ADZM-së, strukturave bashkiake dhe 58 efektivëve ushtarakë me gjashtë automjete. Aktualisht nuk raportohet rrezik për banesat.

Në Përmet, vijon ndërhyrja në dy vatra, në malin e Nëmerçkës mbi Biovizhdë dhe në malin Dhëmbel mbi Badilonjë. Forcat zjarrfikëse dhe ato bashkiake janë mbështetur respektivisht nga 25 dhe 30 efektivë të Forcave të Armatosura. Terreni i vështirë malor po e vështirëson ndërhyrjen, por sipas autoriteteve, vatrat nuk paraqesin rrezik për zonat e banuara.

Në Gurë-Lurë të bashkisë Dibër po zhvillohet një operacion i gjerë nga toka dhe ajri. Në terren janë angazhuar MZSH, forcat bashkiake, Policia e Shtetit, shërbimi pyjor, ADZM, AKMC, strukturat e emergjencave civile dhe vullnetarë, të mbështetur nga 50 efektivë të Forcave të Armatosura dhe dy avionë “Air Tractor”.

Në malin e Moravës, në bashkinë Devoll, vijon puna e forcave të MZSH-së dhe shërbimit pyjor në një zonë me pyll pishe, ndërsa nuk raportohet rrezik për zonat e banuara. Në Mirditë mbeten aktive vatrat në Valcë–Tenë dhe Trojë, ku përveç forcave vendore dhe vullnetarëve janë angazhuar edhe efektivë dhe mjete të Forcave të Armatosura. Ndërkohë, vatra në Vilëz të Kurbinit është kaluar në monitorim pas ndërhyrjes së forcave tokësore dhe një helikopteri të FA-së.

Në Vau të Dejës vijon gjithashtu puna për shuarjen e një zjarri në një zonë me pyll pishe, ku po ndërhyjnë MZSH-ja dhe forcat bashkiake, të mbështetura nga një automjet zjarrfikës i Forcave të Armatosura.

AKMC dhe strukturat e sistemit të Mbrojtjes Civile vijojnë monitorimin dhe koordinimin e operacioneve në të gjithë vendin, si nga toka ashtu edhe nga ajri. Prioriteti i autoriteteve mbetet mbrojtja e jetës së qytetarëve dhe banesave, si dhe izolimi dhe shuarja sa më shpejt e vatrave aktive.