Ministrja Sala: 94% e studentëve të vitit të parë të Mjekësisë, kontratë për të punuar në sistemin tonë shëndetësor

Ministrja e Shëndetësisë dhe Mirëqenies Sociale, prof. Evis Sala thotë se 94% e studentëve që diplomohen në mjekësi kanë nënshkruar kontratat për të punuar në vend. Në ”Ceremoninë e Bluzave të Bardha”, organizuar me pedagogë dhe studentë të vitit të parë, ministrja u ndal në politikat e ndjekura për realizimin e një prej prioriteteve kryesore të sistemit të shëndetësisë në vend, atë të ndalimit të largimit të mjekëve.

”Në fakt 30 e ca vite më parë ishin 150 kuota në mjekësi, pastaj gradualisht është rritur në 350 kuota dhe aktualisht janë 500 kuota pranimi për studentët e mjekësisë. Për herë të parë ka nisur zbatimi i kontratës për shërbimin publik, sipas së cilës çdo student i mjekësisë që diplomohet do të punojë për tre vite në vendin e tij, në sistemin tonë shëndetësor. Jam shumë e kënaqur që 94% e studentëve të vitit të parë e kanë firmosur këtë kontratë”, nënvizoi ministrja. Duke u ndalur tek motivimi dhe vlerësimi i kontributit të mjekëve shqiptarë në misionin e tyre human, ministrja e Shëndetësisë theksoi se do të vijojë rritja eksponenciale e pagave për mjekët specialist deri në 2030.

”Janë përmirësuar ndjeshëm dhe pagat e mjekëve, ku në vitin 2013 paga e mjekut specialist ishte 490 euro, dhe në 2030 synojmë që kjo pagë të jetë 2000 euro”, theksoi ajo, ndërsa u ndal në investimet e rëndësishme që janë bërë ndër vite në sektorin publik të shëndetësisë, si për sa i përket infrastrukturës ashtu edhe formimit të personelit mjekësor. Ceremonia u përshëndet nga rektori Xheladin Draçini, dekania Margarita Gjata dhe profesor Agron Ylli.