Miratohet raporti për Shqipërinë në Parlamentin Europian, Tabaku në Strasburg: Qeveria të reflektojë
Deputetja e PD-së, Jorida Tabaku ka reaguar pas miratimit të raportit të Parlamenti Europian për Shqipërinë, duke e cilësuar atë si një dokument që jo vetëm mbështet integrimin europian të vendit, por edhe evidenton problematikat kryesore me të cilat përballen qytetarët shqiptarë.
Në një video të publikuar në rrjetet sociale nga Strasburgu, Tabaku bëri të ditur se përfaqësues të Partisë Demokratike kanë zhvilluar takime me raporterin për Shqipërinë në Parlamentin Europian, Andreas Schieder, raporterin në hije të PPE-së, Andrey Kovatchev, si dhe me eurodeputetë të tjerë, për të paraqitur shqetësimet që, sipas saj, po ngrihen edhe nga qytetarët në protestë. Sipas Tabakut, raporti i miratuar reflekton situatën reale në vend dhe adreson një sërë çështjesh që lidhen me zgjedhjet, luftën kundër korrupsionit, lirinë e medias, të drejtat e njeriut dhe ekonominë.
Ajo theksoi se dokumenti ngre shqetësime për lidhjen mes shtetit dhe partisë në pushtet, duke kërkuar reforma zgjedhore që garantojnë pasqyrimin e vullnetit të qytetarëve. Gjithashtu, raporti trajton çështje që lidhen me korrupsionin, përfshirë debatin mbi imunitetin e zëvendëskryeministres. Në aspektin ekonomik, Tabaku vuri në dukje se raporti evidenton mungesën e konkurrencës në treg, problematikat që lidhen me Ligjin e Investimeve Strategjike dhe ndryshimet në Ligjin për Zonat e Mbrojtura, duke argumentuar se këto çështje kanë krijuar pengesa për sipërmarrjet dhe investimet e huaja.
Deputetja demokrate ritheksoi se procesi i integrimit europian mbetet rruga kryesore për të adresuar problemet e vendit, duke përmendur luftën kundër korrupsionit, përmirësimin e standardit të jetesës, pensionet, çmimet, meritokracinë dhe forcimin e konkurrencës. Në përfundim, Tabaku deklaroi se mesazhet e dhëna nga Komisioni Europian në raportin IBAR dhe nga Parlamenti Europian në raportin e miratuar së fundmi janë të qarta, ndërsa i bëri thirrje qeverisë të reflektojë mbi kursin që do të ndjekë, mes rrugës europiane dhe, sipas saj, akumulimit të pushtetit dhe modeleve autokratike.
KOHA JONË SONDAZH
