Nënkryetari i PD, deputeti Belind Këlliçi thotë se kryeministri Edi Rama ka shmangur mesazhin kryesor të qytetarëve përmes një fjalimi të gjatë dhe pa përgjigje konkrete. Në deklaratën e tij, Këlliçi tha se protestat e zhvilluara prej javësh nuk kanë si qëllim t’i japin qeverisë një mundësi për korrigjim, por janë një shprehje e pakënaqësisë ndaj qeverisjes së Edi Ramës. ”Qytetarët janë në protestë sepse nuk duan më të kenë të bëjnë me Edi Ramën”, u shpreh Këlliçi, duke akuzuar qeverinë për korrupsion, afera, arrogancë dhe shpërfillje ndaj qytetarëve gjatë 13 viteve në pushtet.
Postimi i plotë
Edi Rama ju shmang mesazhit të vërtetë të protestës sot me një fjalim të gjatë, të mërzitshem, përsëritës, pa ide. Njerëzit nuk janë mbledhur prej gati 2 muajsh në shesh, nuk janë ngritur në revoltë që t’i japin atij një shans të korigjohet. Qytetarët janë në protestë sepse nuk duan më të kenë të bëjnë me Edi Ramën.
Ai pati kohë 13 vite dhe shqiptarët e panë se qeverisja e tij ishte korrupsion, afera të përditshme, lidhje me krimin, arrogancë, shpërfillje e shtypje ndaj qytetarëve. Çdokush e ka bilancin e këtyre 13 viteve. Shumica nuk e përmirësuan dot jetën por u bënë deshmitarë të luksit të shfrenuar të Edi Ramës dhe rrethit të tij.
Pra nuk kemi të bëjmë me një keqkuptim që do rregullohet me dy dokumenta. Kemi të bëjmë me një ndërprerje të kontratës me të cilen ai abuzoi 13 vite rresht. Njerëzit janë lodhur, u ka ardhur në majë të hundës nga fjalime e marifete si sot. Kërkojnë dhe presin vetëm një akt: Jepe dorëheqjen!