Kryeministri Edi Rama, në një intervistë për “Flasim Shqip”, foli për proceset gjyqësore ndaj zyrtarëve dhe ministrave të kabinetit të tij, duke u ndalur te rastet e Arben Ahmetajt, Belinda Ballukut, Erion Veliajt dhe Ilir Metës. I pyetur për vendimin për të emëruar Arben Ahmetajn zëvendëskryeministër edhe kur ndaj tij kishte akuza për çështjen e inceneratorëve, Rama tha se akuzat nuk i përdor si kriter për të larguar apo emëruar dikë. ‘‘Unë duhet të shkarkoja veten time çdo mëngjes ose çdo darkë, sepse ja, jam akuzuar unë. Kjo, duke e ditur shumë mirë veten, më ka bërë gjithmonë të besoj, të dua të besoj që edhe të tjerët akuzohen padrejtësisht”,-tha Rama.
Kryeministri pranoi se në rastin e Ahmetajt koha tregoi se besimi i tij kishte qenë i gabuar. ”Koha tregoi që në këtë rast kishte investuar në një maskë karnavalesh, jo në një aset publik për t’u besuar. Në qoftë se pastaj del që burimi njerëzor mbi të cilin ti ke investuar është i ndotur, apo njeriu që ti ke parë ka qenë një maskë karnavalesh, atëherë është e dhimbshme, po është fakt”.
Duke folur për çështjen e Belinda Ballukut, kreu i qeverisë kundërshtoi pezullimin e saj nga detyra, duke e konsideruar këtë një ndërhyrje në kompetencat e ekzekutivit dhe të institucioneve të tjera kushtetuese. ‘‘Prokurori bashkë me një gjykatës u bashkuan bashkë në një dhomë dhe vendosën që të bëjnë kryeministrin, të bëjnë parlamentin, të bëjnë presidentin. Unë këtë s’mund ta pranoj”,-tha Rama.
Ai theksoi se drejtësia duhet të jetë e pavarur, por sipas tij kjo pavarësi nuk nënkupton të drejtën për të marrë vendime që u takojnë institucioneve politike. ”Ata janë një pushtet i pavarur dhe ne jemi pushteti i pavarur. Ne nuk jemi të pavarur nga ligji, por duhet të zbatojmë ligjin. Ata janë atje të pavarur nga ne që të kontrollojnë zbatueshmërinë e ligjit në raport me interesin publik. Po ata nuk janë të pavarur në pikën që të vendosin për ne”.
Ndërsa për Erion Veliajn, Rama tha se personalisht nuk ka qenë dakord me situatën e krijuar, por nuk kishte as mundësi dhe as arsye për të ndërhyrë në vendimmarrjen e drejtësisë. ”Në rastin e Kryetarit të Bashkisë, unë nuk kam qenë dakord personalisht, por nuk kam pasur dhe s’kam asnjë mundësi dhe arsye që të them jo, kjo nuk mund të ndodhë. Çfarë vije po shkelin? Ata kanë të drejtë ta bëjnë këtë gjë”. Kryeministri tha se në çdo vendim mendon jo vetëm për situatën konkrete, por edhe për precedentin që mund të krijohet në të ardhmen. Ai përsëriti se nuk ka komentuar në themel asnjë prej çështjeve gjyqësore ndaj zyrtarëve.
I pyetur nëse në rastin e Ilir Metës mund të ketë hakmarrje politike, Rama e mohoi dhe tha se për ish-presidentin ndien më shumë keqardhje sesa armiqësi. ”Unë nuk jam njeri hakmarrës. Dhe tjetra, unë nuk kam arsye të hakmerrem me Ilir Metën. Unë për Ilir Metën ndjej keqardhje realisht, se ishte një talent i madh politik që nuk e mbajti dot peshën”.
Rama u shpreh gjithashtu kundër përdorimit të zgjatur të paraburgimit, duke thënë se Shqipëria ka një problem serioz me këtë praktikë. Sa i përket Reformës në Drejtësi, kryeministri tha se përgjegjësia e tij politike është që reforma të vijojë dhe institucionet e reja të konsolidohen. Sipas tij, standardi duhet të jetë i njëjtë për të gjithë, pavarësisht përkatësisë politike. ”Zotimi para shqiptarëve që këtu s’ka majtas-djathtas, po u identifikove si subjekt hetimi do hetohesh dhe po u identifikove si subjekt dënimi do dënohesh, të mos thyhet si zotim. Nëse unë kam bërë këtë, përgjegjësia ime politike është e kryer”.