Nga Durrësi në protestë, pensionisti: Vij çdo ditë me autobus, Rama do të largohet

Një qytetar i moshuar nga Durrësi i është bashkuar protestës në ditën e 47-të, ku shprehu pakënaqësinë e tij për mungesën e një zgjidhjeje për çështjet e pronësisë. Ai deklaroi se kjo problematikë e ka shtyrë të dalë në protestë, duke kërkuar zgjidhje dhe trajtim të drejtë të çështjeve të pronave.

”Protestoj për pronat e mia që mi kanë marrë. Kam qenë 35 vjeç që kur kam nisur gjyqet dhe sot jam 71. Jam përplasur me Ramën në 2019. E kemi mbajtur për kryeministër, është fatkeqësi për kombin tonë. Kam besim se do të ikë shumë shpejt. Kjo s’më ka penguar. Mendoj se drejtësia do të vihet për të gjithë”, tha ai.

Në mesin e qytetarëve të shumtë që kanë dalë në shesh për të ngritur zërin, një i moshuar tjetër ka shprehur zhgënjimin e madh me gjendjen ekonomike dhe sociale në vend. Ai ka denoncuar rrogat e ulëta dhe situatën e rënduar në sistemin shëndetësor.

“Çdo gjë është kundër popullit. Rrogat janë të vogla, spitalet janë copë-copë. Rama nuk e pranon situatën, asgjë nuk shkon në këtë vend, nuk po shohim asgjë të mirë”,-u shpreh i moshuari i revoltuar.