Kreu i Partisë Demokratike, Sali Berisha, ka komentuar zhvillimet e javës së fundit në vend, duke u ndalur te protesta qytetare që vijon prej 76 ditësh dhe situata e krijuar nga zjarret në disa zona të Shqipërisë. Në një komunikim me ndjekësit në rrjetet sociale, Berisha akuzoi qeverinë dhe kryeministrin Edi Rama për indiferencë ndaj situatës së krijuar nga zjarret, ndërsa vlerësoi punën e forcave zjarrfikëse.
Sipas tij, dhjetëra punonjës të shërbimeve zjarrfikëse janë përballur prej ditësh me vatra zjarri në zona të ndryshme të vendit, ndërsa, pretendoi Berisha, nuk kanë marrë mbështetjen e nevojshme nga institucionet. Kreu demokrat u ndal gjithashtu te protestat e zhvilluara në Tiranë dhe qarqe të tjera, duke i cilësuar ato si një lëvizje që, sipas tij, po vijon pavarësisht përpjekjeve të qeverisë për ta ndalur.
Berisha deklaroi se protesta e të rinjve dhe qytetarëve do të vijojë edhe gjatë muajve të ardhshëm. Ai u bëri thirrje mbështetësve të Partisë Demokratike që t’i bashkohen protestave, duke e cilësuar vjeshtën si një periudhë vendimtare për aksionin opozitar. “Vjeshta është vjeshta e shqiptarëve, është vjeshta e lirisë”, u shpreh Berisha, duke kërkuar mobilizimin e demokratëve dhe qytetarëve në mbështetje të protestave. Në përfundim, kreu i PD-së deklaroi se, sipas tij, protesta do të vijojë deri në realizimin e objektivave të saj politikë.
Pjesë nga deklarata
Java ishte një javë tejet e nxehtë, e dominuar nga protestat në mbarë vendin, në Tiranë dhe në një seri qarqesh të Shqipërisë, kundër korrupsionit, arbitraritetit të kreut të Meduzës, Edi Rama, dhe organizatës së tij kriminale.
Java ishte java e zjarreve, e dhjetëra e dhjetëra zjarreve të shumta, të cilat kërcënuan, jo në një, por në disa zona të banuara të vendit, banesat dhe jetën e qytetarëve.
Përballë këtyre zjarreve, narkoqeveria vazhdonte pushimet. Edi Rama dhe ministrat e tij rreziteshin në diell, duke luajtur kumbar dhe në indiferencë të plotë ndaj asaj që po ndodh.
Prej më shumë se dy javësh, me dhjetëra e qindra punonjës heroikë të zjarrfikësve dhe të tjerë janë përballur me guxim me zjarret në katër anët e vendit.
Asnjë qindarkë shtesë nuk kanë marrë deri më sot, përveç mashtrimeve të Edi Ramës.
Pamjet e ushqimit të tyre janë mjerim.
Është një injorim, një mosmirënjohje e thellë, e turpshme për sakrificën dhe djersën që derdhin, për rrezikun me të cilin përballen këta burra, por edhe qytetarët.
Ndërkohë, protesta rinore qytetare, uragani i lirisë, vazhdon e pamposhtur.
Ka dështuar me turp e gjithë përpjekja e Edi Ramës për ta përçarë, si dhe të gjitha format e përdorura për kërcënim, miklim etj. ndaj tyre.
Ajo protestë është sot zëri i Shqipërisë në Evropë dhe në botë.
Pavarësisht indiferencës kriminale që qeveria dhe Edi Rama dëshmojnë ndaj saj.
Pavarësisht nga metodat e terrorizmit politik dhe psikologjik që përdoren ndaj protestuesve, asgjë nuk do ta ndalë uraganin e lirisë pa triumfuar.
Vjeshta është vjeshta e shqiptarëve, është vjeshta e lirisë, është vjeshta në të cilën qytetarët marrin në dorë fatin e tyre.
Ndaj, ftoj çdo demokrate e demokrat të marrë pjesë në protestë, ta mbështesë protestën me pjesëmarrjen e tij ose të saj, si një kontribut historik për vendin, si një kontribut historik për të ardhmen e Shqipërisë.