Nis protesta, dita e 23-të. Thirrja e qytetarëve: Dorëheqje dhe qeveri teknike! Do të ketë përshkallëzim

Në sheshin ”Skënderbej” kanë nisur grumbullime dhe organizime protestuesish që kërkojnë dorëheqjen e kryeministrit Edi Rama. Gjatë protestës, disa pjesëmarrës kanë përmendur si shembull një rast nga Spanja, ku një ish-ministër është dënuar me burgim të gjatë, duke e lidhur këtë me nevojën për funksionim më të fortë të drejtësisë edhe në Shqipëri.

Në deklaratat e tyre, protestuesit kanë kritikuar qeverinë për situatën ekonomike, duke pretenduar se pagat janë më të ulëta në Europë ndërsa çmimet mbeten të larta. Ata e kanë cilësuar këtë si një situatë që, sipas tyre, po ndikon në largimin e qytetarëve nga vendi. Po ashtu, u theksua kërkesa për “qeveri teknike” dhe dorëheqje të ekzekutivit, ndërsa u paralajmërua se, nëse kërkesat nuk merren parasysh, protestat mund të përshkallëzohen.

”Kjo qeveri ia ka bërë jetën të pamundur çdo qytetari. Rrogat më të ulëta në Europë dhe çmimet më të larta. Kjo tregon se këtu ka një axhendë shpopulluese të mirëfilltë. Drejtësi duhet bërë siç u bë në Spanjë, një ish ministër u dënua me 23 vite burg. Këtu jemi të gjithë bashkë. Do ketë tentativa për përçarje, por ne do i shkojmë deri në fund. Dorëheqje dhe qeveri teknike. Nëse kjo qeveri nuk e ka kuptuar akoma, atëherë do të ketë një përshkallëzim dhe përshkallëzimin do e vendosë, sovrani populli se si do të bëhet”, u shpreh një protestues.