”Një ngjarje që ndodh një herë në 50 vjet”, Dervishi: Në protestë po dominon shtresa e mesme

Gazetari Lutfi Dervishi e cilëson protestën kundër investimit në Zvërnec, si një ngjarje që ndodh “një herë në 50 vjet për nga përmasat, intensiteti dhe energjia”. Për të protesta është rezultat i një akumulimi të gjatë pakënaqësish qytetare, duke shtuar se “pika që derdhi kupën ishte Zvërneci”, ndërsa njerëzit po vazhdojnë të qëndrojnë në shesh edhe për arsye të tjera.

Sipas Dervishit, protesta është e veçantë sepse ka mobilizuar të rinjtë dhe shtresën e mesme, në një kohë kur për vite me radhë është folur për apati dhe mungesë reagimi shoqëror. “Ka dalë shtresa e mesme”, u shpreh ai, duke e konsideruar këtë një nga karakteristikat më të rëndësishme të lëvizjes.

Ai vlerësoi gjithashtu ndikimin e protestës në imazhin e Shqipërisë jashtë vendit, duke theksuar se mobilizimi qytetar e ka paraqitur vendin në një dritë pozitive. Sipas tij, fakti që protestat po zhvillohen jo vetëm në Tiranë, por edhe në qytete të tjera të Shqipërisë dhe në vende të Bashkimit Europian, tregon se bëhet fjalë për një fenomen që “nuk mund të injorohet”.

I ftuar në ”A2cnn”, Dervishi argumentoi se protesta nuk është thjesht kundër qeverisë, por “kundër modelit të zhvillimit dhe establishmentit”, pasi qytetarët po kërkojnë ndryshim më të thellë në mënyrën se si funksionon shteti dhe shoqëria shqiptare. Ai shtoi se një tjetër veçori e saj është organizimi i mirë, pavarësisht mungesës së liderëve të dukshëm.