Një vit nga lirimi, Salianji: Pushteti nuk mund të burgosë kurrë bindjet, të vërtetën dhe idealet

Një vit pas lirimit nga qelia, ish-deputeti i PD-së, Ervin Salianji, ka reaguar përmes një postimi në rrjetet sociale, duke rikujtuar periudhën e përballjes së tij me drejtësinë. Në mesazhin e tij, Salianji e cilëson dënimin si një akt me natyrë politike dhe shprehet se periudha e privimit të lirisë nuk ndikoi në bindjet dhe qëndrimet e tij. Sipas ish-deputetit, kufizimi i përkohshëm i lirisë nuk mund të ndryshonte parimet dhe idealet për të cilat ai thotë se ka qëndruar.

Postimi i plotë

Sot, një vit liri. Një vit më parë mori fund sprova e burgosjes politike. E sanksionuar si e tillë nga 6 rezoluta ndërkombëtare! Pushteti mund të shtrëngojë, mund të kufizojë përkohësisht lirinë e një njeriu, por nuk mund të burgosë kurrë bindjet, të vërtetën dhe idealet që ai ka.

Përherë kam zgjedhur të mos ndryshoj bindjet për t’iu përshtatur rrethanave. Sepse liria nuk është privilegj që të jepet nga pushteti; është e drejtë që mbrohet çdo ditë.
Shqipëria ka nevojë për institucione që respektojnë ligjin, për politikë që pranon mendimin ndryshe dhe për qytetarë që nuk heqin dorë nga e drejta për të kërkuar më shumë demokraci, më shumë drejtësi dhe më shumë llogaridhënie.

Një vit më vonë, bindja ime është edhe më e fortë: pengesat mund ta vonojnë rrugën, por nuk e ndryshojnë drejtimin. Mirënjohje për mbështetjen e jashtëzakonshme.