“Njësitë administrative nuk funksionojnë”, Rama paralajmëron ndryshime në Reformën Territoriale

Kryeministri Edi Rama ka publikuar në Facebook pamje nga takimi informues për Reformën Territoriale me përfaqësues të bashkive të Qarkut Gjirokastër.

Gjatë takimit u diskutua për një organizim më efikas të qeverisjes vendore, si dhe për forcimin e përfaqësimit të qyteteve në këshillat bashkiakë.

Rama theksoi nevojën për riorganizimin e njësive administrative dhe për një ndarje më funksionale të përgjegjësive në nivel vendor. Sipas tij, disa funksione nuk mund të përballohen në mënyrë efektive nga bashkitë e vogla, ndërsa edhe bashkitë e mëdha përballen me vështirësi në këtë drejtim.

Kryeministri bëri me dije se, në kuadër të ndryshimeve të propozuara, çdo qytet do të ketë drejtuesin e tij, i cili do të jetë edhe nënkryetar i bashkisë. Po ashtu, qytetet do të kenë përfaqësuesit e tyre në këshillin bashkiak, ndërsa përbërja e këshillit do të përcaktohet përmes kuotave.

Rama u shpreh gjithashtu se njësitë administrative aktualisht nuk po e përmbushin siç duhet funksionin e tyre dhe se nevojitet një organizim i ri për t’u dhënë atyre më shumë efektivitet.

Në takimin në Gjirokastër u diskutua edhe për propozimet për bashkimet Libohovë–Gjirokastër, Memaliaj–Tepelenë dhe Këlcyrë–Përmet. Sipas Ramës, këto ndryshime synojnë fuqizimin ekonomik dhe social të komuniteteve, racionalizimin e burimeve njerëzore në nivel vendor dhe përgatitjen për menaxhimin e fondeve që lidhen me anëtarësimin në Bashkimin Evropian.