Nuk morën pagat, unioni i Gjyqtarëve dhe Shoqata e Prokurorëve: Të llogariten sipas formulës së Kushtetueses

Një situatë e paprecedentë ka përfshirë sistemin e drejtësisë, pasi pagat e magjistratëve, funksionarëve dhe personelit të administratës gjyqësore e prokurorisë nuk po ekzekutohen nga Drejtoria e Thesarit. Në një deklaratë të përbashkët, Unioni i Gjyqtarëve, Shoqata Kombëtare e Gjyqtarëve dhe Shoqata e Prokurorëve shprehin shqetësimin për bllokimin financiar, i cili, sipas tyre, cenon funksionimin normal të institucioneve.

Situata lidhet me zbatimin e Vendimit nr. 15, datë 17.02.2026, të Gjykatës Kushtetuese, që përcakton përllogaritjen e pagave sipas formulës së re, me efekt prapaveprues nga prilli 2023. Në zbatim të këtij vendimi, KLGJ dhe KLP kanë miratuar pagën referuese bazë dhe kanë kërkuar nisjen e pagesave.

Më 2 shtator, ekzekutimi financiar është bllokuar. Shoqatat theksojnë se vetëm në dy prokurori janë kryer pagesat me përllogaritjen e re, çka, sipas tyre, tregon se procesi është teknikisht i mundur. Bllokimi ka prekur edhe administratën gjyqësore dhe atë të prokurorisë, të cilat kanë mbetur pa paga në afat.

Shoqatat i bëjnë thirrje Ministrisë së Financave dhe ministrit përgjegjës për ndërhyrje të menjëhershme për zhbllokimin e situatës. Në të kundërt, ato paralajmërojnë përdorimin e të gjitha mjeteve ligjore, përfshirë kërkimin e përgjegjësisë ligjore dhe penale ndaj personave apo strukturave përgjegjëse.