Në orën 19:00 të kësaj mbrëmjeje pritet të zhvillohet protesta e 20-të radhazi, ku qytetarët do të kërkojnë sërish dorëheqjen e kryeministrit Edi Rama.
Pavarësisht se protestat kanë hyrë në ditën e tyre të 20-të, organizatorët dhe pjesëmarrësit theksojnë se mobilizimi ka mbetur i lartë. Edhe mbrëmjen e kaluar, dhjetëra protestues u mblodhën përpara godinës së Kryeministrisë, duke vijuar aksionin e përditshëm që ka nisur prej më shumë se dy javësh.
Për 19 ditë me radhë, qytetarë nga zona të ndryshme janë bashkuar në tubime, duke shprehur pakënaqësitë e tyre dhe duke kërkuar ndryshime në drejtimin politik të vendit.
Sipas planit të paralajmëruar, pas grumbullimit para Kryeministrisë, protestuesit pritet të marshojnë në disa nga akset kryesore të kryeqytetit, ku do të përsërisin kërkesat dhe mesazhet e tyre.
Pjesëmarrësit janë shprehur se do të vazhdojnë protestat deri në arritjen e objektivit të tyre kryesor: largimin e kryeministrit dhe të qeverisë aktuale.