Kryeministri Edi Rama informon se libri ”The Albanian Files” do të jetë së shpejti në libraritë ”Adrion”, duke e cilësuar si një rast të paprecedentë në historinë e botimeve. Sot protestuesit dorëzuan në SPAK librin ”Albanian Files”, të cilin e konsiderojnë si provë kundër kreut të qeverisë.
Përmes një postimi në rrjetet sociale, Rama shkruan se vepra ka hyrë në histori si libri i parë që trajtohet si provë krimi 80 vjet pas rënies së nazizmit dhe 35 vjet pas rënies së komunizmit. ”LIBRI I MALLKUAR së shpejti në “Adrion”, pasi sapo hyri sot në histori si i pari libër, që trajtohet si provë krimi 80 vjet pas rënies së nazizmit dhe 35 vjet pas rënies së komunizmit”,-shkruan Rama.
Dy ditë më parë duke folur në lidhje me librin që përmban projekte që synohen të ndërtohen në Shqipëri, kryeministri theksoi se nuk është autor, por vetëm ka shkruajtur parathënien e tij. Po ashtu Rama është shprehur se kemi të bëjmë me një tekst auto-ironik, ku nuk ka deklarata politike.
Në deklaratën para SPAK-ut, organizatorët thanë se libri përmban të dhëna për 523 projekte dhe pretenduan se ai dokumenton shmangien e konsultimit publik, konflikt interesi dhe favorizim të interesave private. Ata shprehën mbështetje për SPAK-un dhe kërkuan nisjen e hetimeve ndaj kryeministrit.