Ish-kryeministri Pandeli Majko, ka reaguar për çështjen e hapjes së një konsullate të Serbisë në Shkodër, duke ngritur pikëpyetje mbi simbolikën dhe mesazhin politik të këtij vendimi. Majko e krahason këtë zhvillim me mundësinë e hapjes së një konsullate shqiptare në Luginën e Preshevës, duke theksuar rëndësinë e komunitetit shqiptar që jeton në atë zonë të Serbisë. “Në Shkodër konsullata serbe do të ketë më rëndësi se sa vetë minoriteti”, shkruan Majko, duke argumentuar se për Shqipërinë një përfaqësi e tillë mund të shihet si një veprim standard diplomatik, ndërsa për Serbinë ajo merr një ngarkesë tjetër politike.
Postimi i plotë
Konsullatë serbe në Shkodër?! Në Shkodër konsullata serbe do të ketë më rëndësi se sa vetë minoriteti!
Kundrejt hapjes së kosullatës serbe në Shkodër do të hapet konsullata shqiptare në Luginën e Preshevës! Krahasimi është më shumë se një ironi. Lugina e Preshevës është një vazhdimësi teritoriale e banuar nga shqiptarët e mbetur në sovranitetin e Serbisë!
Konsullata në Luginën e Preshevës “shmang” Kosovën! Në Shkodër, konsullata serbe ka Malin e Zi në mes!
Për Shqipërinë duket se konsullata është trajtuar si shprehje e interesit standart! Për Serbinë, që nuk njeh sovranitetin e Kosovës dhe diskuton identitetin e Malit të Zi, është diçka tjetër! Serbia në Shkodër ka marrë më shumë se një konsullatë!