Partizanët e qeverisë së Kosovës përballë BE

 

Nga Lavdrim Lita

 

Afishet ilegale të fotos së pasaportës së Përfaqësuesit të Bashkimit Europian në Kosovë, ku gjoja i refuzohej viza hyrëse në Kosovë, janë  gjeste me prapavijë politike. Këto afishe ilegale janë vendosur në Prishtinë një ditë pas deklaratës së zëvendëskryeministrit të Kosovës, Hashim Thaçi si reagim partiak e politik për shtyrjen e liberalizimit të vizave në pranverë.  Për pesë vjet me radhë, ish-kryeministri i Kosovës, Hashim Thaçi, nuk u ndal asnjëherë së premtuari liberalizimin e vizave për qytetarët e Kosovës, ndonëse me vështirësi janë përmbushur pjesa më e madhe e kriteret teknike.  Kanë mbetur për t’u certifikuar edhe 8 kritere të tjera.

Mirëpo qeveria Mustafa-Thaçi ka vendosur të trashë zërin me financuesit më të madh të Kosovës. Kritikat e zyrtarëve të lartë të Kosovës kundrejt BE-së dhe sulmet personale ndaj dinjitarëve të BE në Prishtinë nga ministra të papërgjegjshëm janë veprime provinciale.   E kuptueshme që Qeveria e Kosovës e zënë në çark në parlament, e sfiduar në rrugë dhe me rritje të radikalizmit fetar, po synon të drejtojë mërinë publike  ndaj Bashkimit Europian që nuk po i hapka derën qytetarëve të ikin nga vendi!!! Qeveria e Isa Muftafës harron të kuptojë se kjo sjellje anti-perëndimorë rrezikon të shfrytëzohet nga pasardhësit e haxhiqamilistëve në shoqërinë e Kosovës.

E vërteta është që Bashkim Europian po përballet me shume probleme, që nga vërshimi i refugjatëve sirianë e imigrantëve shqiptarë e kosovarë nga rajoni, kriza ekonomike-financiare e deri tek terrorizmi, dhe nuk ka terezi të shtojë problemet brenda saj, me hapjen e dritës jeshile qeverisë së Kosovës, e cila nuk bënë asgjë të dobishme për të qenë e pranueshme. Gjykata Speciale, marrëveshjet e nënshkruara me Serbinë dhe ratifikimi i marrëveshjes kufitare me Malin e Zi janë punë të pakryera.

Qeveria e Kosovës duhet të kuptojë që Kosova po i kushton shumë qytetarëve të BE-së.  Bashkimi Europian është donatori më i madh që ofron ndihmë për Kosovën dhe rajonin e Evropës Juglindore në tërësi dhe udhëheq përpjekjet e rindërtimit.  Kosova ka marrë mbi 2 miliardë euro ndihmë nga BE-ja që nga viti 1999. Misioni EULEX i kushton qytetarëve të Bashkimin Evropian mbi 111 milionë euro dhe zyrtarët e Prishtinës zyrtare i shpërblejnë duke rritur krimin dhe korrupsionin, duke mos ngritur Gjykatën Speciale, emigrimi masiv dhe bllokimin e Parlamentit.

(Autori është gazetar nga Tirana dhe njohës i mirë i rrethanave politike e shoqërore në Shqipëri, Kosovë e Maqedoni. MA në Kolegjin e Evropës)