Partizani “vritet” në Vlorë, Elbasani bën mrekullinë në Fier

Lajme E Shtunë, 17 Prill 2021 18:46

Thyehet Partizani, thyhet edhe Alban Hoxha, megjithatë, pavarësisht humbjes në Vlorë, të kuqtë mbeten në krye të klaisifkimit dhe portieri i kryeqytetasve thyen rekordin e Bujar Gogunjës. Hoxha u ndëshkua në minutën e ’85, pas plot 1085 pa e nxjerrë topin nga rrjeta. Takimi mes Flamurtarit dhe Partizanit, i vlefshëm për javën e 16-të të Superiores, u mbyll 1-0 në favor të ekipit vlonjat. Pesë minuta para fundit, kur u duk se ndeshja do të mbyllej në barazim pa gola, Shehaj gjeti rrugën e rrjetës për vendasit dhe i dha tre pikë të çmuara Flamurtarit. Skënderbeu mund ta kishte barazuar me pikë në rast fitoreje, por u ndal nga Tirana, në “Qemal Stafa”, 2-0. Tashmë janë bardheblutë, që rikuperojnë pas humbjes në derbi dhe afrohen në vend të dytë, një pikë larg Partizanit. Italiani i stolit të Flamurtarit, Ramella, ishte padyshim i kënaquri i ndeshjes së djeshme. – “Jam i kënaqur me paraqitjen e skuadrës, duke parë portierin tim që as i bëri pis pantallonat. Kjo do të thotë që kundërshtari nuk bëri asnjë gjuajtje në portë dhe ne krijuam aq shumë në pjesën e parë sa meritonim ta fitonim jo një herë por 4-5 herë ndeshjen. Djemtë ishin perfektë që nga minuta e parë deri në të 90-tën kështu që komplimente lojtarëve,” – theksoi ai. Në kampin tjetër, Shpëtim Duro, nuk mund ta përjetonte ndryshe humbjen, që vjen një javë pas asaj fitoreje historike në derbi. – “Jam i zhgënjyer se e kishim komplet nën kontroll situatën sidomos në pjesën e dytë, dhe goli erdhi në një moment që nuk e prisnim. Ishte një mungesë vëmendjeje në një goditje standart, por duhet ta pranojmë, ky është futbolli,” – theksoi Duro. Vllaznia-Laçi, që u zhvillua në “Loro Boriçi, zhbllokohet në minutën e 4-ët shtesë, teksa vendasit gjetën golin me anë të uruguaianit Soza, i cili shfrytëzon si duhet një krosim dhe realizon një gol të bukur me kokë. Vllaznia mer fitoren e katërt rradhazi dhe e sheh veten në kuotën e 20 pikëve, 1 pikë më pak se Laçi. Por surprizë ishte fitorja e Elbasanit në Fier, 1-0, që rihap garën në fund të klasifikimit. Rreth 15 minuta para përfundimit, Lamçja shënoi golin e fitores, duke befasuar vendasit. Elbasani ngjitet në kuotën e 9 pikëve dhe barazon Apoloninë, ndërkohë që Teuta ndodhet pesë pikë para tyre, por ka ndeshje direkte me fierakët, një javë më vonë.