Pas thirrjes së Ramës, Bashkia Patos hap dëgjesën për ndarjen e re territoriale

Një ditë pas takimit të tensionuar mes kryeministrit Edi Rama dhe disa kryebashkiakëve socialistë, Bashkia e Patosit ka njoftuar zhvillimin e një dëgjese publike për reformën e re Administrative-Territoriale 2.0.

Sipas njoftimit të bashkisë, takimi synon të mbledhë mendimet dhe rekomandimet e banorëve të Patosit, përfaqësuesve të njësive të vetëqeverisjes vendore, grupeve të interesit dhe aktorëve të tjerë lidhur me riorganizimin territorial dhe mënyrën se si ka funksionuar ndarja aktuale.

Bashkia u ka bërë thirrje qytetarëve që të marrin pjesë në dëgjesë, duke e cilësuar kontributin e tyre të rëndësishëm për një proces sa më transparent dhe gjithëpërfshirës. Konsultimi publik vjen në një moment kur në Patos ka pasur reagime kundër ndryshimeve të mundshme territoriale. Dhjetëra qytetarë kanë protestuar në qendër të qytetit, duke kundërshtuar çdo skenar për shkrirjen e Bashkisë Patos dhe bashkimin e saj me Bashkinë Fier.