Pas vizitës në SHBA, Berisha flet për diasporën: “I gjeta më të fortë”

Sali Berisha ka folur sot për mediat në Tiranë, pak pas kthimit të tij nga Shtetet e Bashkuara të Amerikës, ku zhvilloi takime me përfaqësues të diasporës shqiptare.

Berisha e cilësoi vizitën si një prej udhëtimeve më të rëndësishme dhe frymëzuese të jetës së tij, duke e përshkruar si një periudhë “ripërtëritjeje”.

Ai u ndal veçanërisht te takimet me diasporën shqiptare, të cilat i cilësoi si të jashtëzakonshme. Sipas Berishës, këto takime i rikthyen kujtimet e 35 viteve më parë, kur ai dhe bashkëpunëtorët e tij kërkonin mbështetjen e diasporës dhe të SHBA-së për rrëzimin e komunizmit.

Berisha tha se edhe sot diaspora mbetet një faktor me rëndësi të madhe, duke pretenduar se e ka gjetur atë shumë më të fuqishme dhe më të konsoliduar se në të kaluarën.

Ai e lidhi këtë rol me zhvillimet politike në Shqipëri, duke e cilësuar situatën aktuale si një përballje me një regjim që, sipas tij, mbahet nga droga dhe “dogma e komunizmit”.