PD kërkon rishikim të hartës administrative: 6 rajone dhe 100 bashki. Duhet dëgjuar zëri i qytetarëve

Partia Demokratike për Reformën Territoriale kërkon 100 bashki, 12 qarqe dhe 6 rajone. Kreu i grupit parlamentar të PD-së, Gazment Bardhi, thotë se reforma territoriale e vitit 2014 ka ndikuar në shpopullimin e vendit, ndërsa propozimi i ri i mazhorancës sipas tij rrezikon të thellojë këtë fenomen.

“Reforma territoriale e vitit 2014 ishte leva e Arkimedit për shpopullimin e Shqipërisë! Reforma e re e propozuar nga PS ka si qëllim zbrazjen e mëtejshme të Shqipërisë. Kjo nuk është reformë, është hartë elektorale”, u shpreh Bardhi.

Sipas PD-së, ndryshimi i hartës territoriale duhet të shoqërohet me një proces të gjerë konsultimi me qytetarët dhe me respektimin e Kartës Europiane të Vetëqeverisjes Vendore dhe Kushtetutës.

Postimi i plotë

100 Bashki-12 Qarqe-6 Rajone! Ky është propozimi i PD për Reformën Territoriale.

Reforma territoriale e vitit 2014 ishte leva e Arkimedit për shpopullimin e Shqipërisë! Reforma e re e propozuar nga PS ka si qëllim zbrazjen e mëtejshme të Shqipërisë. Kjo nuk është reformë, është hartë elektorale!

Shqipëria nuk mund të rishkruhet pa qytetarët!

Ndryshimi i hartës territoriale kërkon dialog kombëtar, konsultim real dhe respektim të Kartës Europiane të Vetëqeverisjes Vendore e të Kushtetutës. Një reformë e imponuar nuk ndërton konsensus, por prodhon konflikt.

Prandaj, duke dëgjuar zërin e qytetarëve, PD ka paraqitur porpozimin e vet për Reformën Territoriale – 100 Bashki/12 Qarqe/6 Rajone!