Pedagogia e Fakultetit të Drejtësisë në Universitetin e Tiranës, Enkeleda Olldashi ka shprehur mbështetjen e saj për studentët që prej ditësh protestojnë, duke deklaruar se do të qëndrojë në krah të tyre deri në plotësimin e kërkesave. Olldashi u shpreh se pedagogët nuk mund të qëndrojnë në auditorë kur studentët janë në shesh. ”Në momentin që unë nuk i kam studentët në auditor, unë shkoj aty ku janë studentët”, deklaroi ajo, duke shtuar se protesta tashmë është shndërruar në një revoltë dhe shprehje të zemërimit të të rinjve.
Pedagogia kritikoi gjithashtu moszbatimin, sipas saj, të Paktit për Universitetin të vitit 2018, duke theksuar se marrëveshjet nuk duhet të mbeten vetëm në letër, por të përkthehen në zgjidhje konkrete për studentët.”Paktet nuk mund të jenë në letër. Parimet që unë ua shpjegoj studentëve duhet të jetësohen”, u shpreh Olldashi, e cila tha se e shqetëson fakti që në vend që të zhvillojë leksione, i duhet të dalë në shesh për të mbrojtur studentët e saj.
Ajo reagoi edhe ndaj deklaratave të kryeministrit Edi Rama lidhur me bursat për studentët që marrin pjesë në protestë, duke nënvizuar se përfitimi i tyre përcaktohet nga ligji dhe kriteret përkatëse. ”Bursën zoti kryeministër, nuk e jepni ju. Bursën e jep ligji”, deklaroi pedagogia, duke argumentuar se bursat lidhen me rezultatet e larta akademike dhe me gjendjen ekonomike të familjeve.
Olldashi kritikoi gjuhën e përdorur ndaj studentëve dhe të rinjve, duke paralajmëruar për pasojat psikologjike që mund të sjellë presioni verbal. ”Dhuna verbale godet më shumë se një gur. Po dëmtojmë një gjeneratë të re”, u shpreh ajo për A2 CNN, duke theksuar se veçanërisht gjimnazistët duhet të dëgjohen dhe të mos përballen me presion.
Në përfundim, pedagogia deklaroi se do të vijojë të mbështesë studentët dhe se është e gatshme të përballet edhe me masa të mundshme ndaj saj për qëndrimin e mbajtur. ”Nëse do të marrë masa ndaj pedagogëve për këtë që po ndodh, le ta marrë të parën masë ndaj meje”, përfundoi Olldashi.