Niko Peleshi në Vatikan, takim me Atin e Shenjtë, Papa Leoni XIV

Lajme E Enjte, 25 Qershor 2026 15:27

Kryetari i Kuvendit të Shqipërisë, Niko Peleshi, u takua në Vatikan me Atin e Shenjtë, Papa Leoni XIV.

“Nder dhe kënaqësi e veçantë takimi në Vatikan me Atin e Shenjtë, Papa Leoni XIV.

Një moment i veçantë që rikonfirmon lidhjet e hershme të miqësisë dhe respektit mes Shqipërisë dhe Selisë së Shenjtë, të ndërtuara mbi dialogun, mirëkuptimin dhe vlerat e përbashkëta.

Shqipëria mbetet një shembull i harmonisë, tolerancës dhe bashkëjetesës fetare, pjesë e trashëgimisë dhe identitetit tonë kombëtar dhe një kontribut i çmuar për qytetërimin. Në një botë plot sfida, mesazhet e Atit të Shenjtë për paqen, humanizmin dhe dialogun janë më të rëndësishme se kurrë.

Kënaqësi t’i dorëzoja Atit të Shenjtë një dhuratë simbolike nga Shqipëria, si shenjë miqësie dhe respekti, duke kujtuar lidhjet tona historike me Selinë e Shenjtë dhe figurën e Papa Klementit XI, me origjinë arbërore, Pontifikati i të cilit mbetet një burim krenarie për shqiptarët”- shkruan kryeparlamentari Peleshi.

Takimi ishte një moment i veçantë që rikonfirmoi marrëdhëniet shumë të mira ndërmjet Shqipërisë dhe Selisë së Shenjtë, të mbështetura mbi respektin dhe vlerat e përbashkëta si edhe vlerësimin për kontributin e Selisë së Shenjtë dhe Atit të Shenjtë për dialogun e bashkëpunimin për mbrojtjen e paqes, mirëqenies dhe sigurisë.

Kryetari i Kuvendit i dorëzoi Atit të Shenjtë një dhuratë simbolike nga Shqipëria, si shprehje e miqësisë dhe respektit të popullit shqiptar. Përmes saj u sollën në vëmendje lidhjet historike ndërmjet Shqipërisë dhe Selisë së Shenjtë, duke kujtuar figurën e Papa Klementit XI, Gjon Françesk Albanit, me origjinë arbërore, dhe kontributin e tij në mbështetje të përpjekjeve kombëtare shqiptare për liri e pavarësi.

Shqipëria mbetet një shembull i harmonisë, tolerancës dhe bashkëjetesës fetare, vlera që janë pjesë e identitetit tonë kombëtar dhe një kontribut i çmuar për qytetërimin.

Në këtë takim, Kryetari i Kuvendit shoqërohej nga Zëvendëskryetari Agron Gjekmarkaj, deputetët Iris Luarasi dhe Ermal Pacaj, si edhe Ambasadorja e Shqipërisë pranë Selisë së Shenjtë, Majlinda Frangaj.