Përmbushja e angazhimeve të Shqipërisë ndaj NATO-s, buxheti i mbrojtjes arrin në 2.6% të PBB-së, 10.3 miliardë lekë shtesë

Ministri i Financave, Petrit Malaj, bëri të ditur se përmes Aktit Normativ për Buxhetin 2026, qeveria po forcon mbrojtjen kombëtare dhe po përmbush angazhimet e Shqipërisë ndaj NATO-s.

Sipas Malajt, Akti Normativ parashikon një financim shtesë prej 10.3 miliardë lekësh për sektorin e mbrojtjes, si edhe shtimin e 300 efektivëve në radhët e Forcave të Armatosura.

Ai deklaroi se, me këto ndryshime, buxheti i mbrojtjes arrin në 2.6% të Prodhimit të Brendshëm Bruto (PBB), duke synuar modernizimin e kapaciteteve mbrojtëse, rritjen e gatishmërisë operacionale dhe forcimin e sigurisë kombëtare.

“Përmes Aktit Normativ për Buxhetin 2026, forcojmë mbrojtjen kombëtare dhe përmbushim angazhimet e Shqipërisë ndaj NATO-s.

Me një financim shtesë prej 10.3 miliardë lekësh dhe 300 efektivë të rinj në Forcat e Armatosura, buxheti i mbrojtjes arrin në 2.6% të PBB-së, duke garantuar modernizimin e kapaciteteve mbrojtëse dhe rritjen e sigurisë së vendit.

Një Shqipëri më e sigurt, më e fortë dhe një aleate më e denjë”, shkruan Malaj.