Shtatori për protestën kundër qeverisë ka nisur me përplasje, sikurse ishte artikuluar përgjatë muajit gusht. Situata është tensionuar mbrëmjen e sotme para godinës së Kryeministrisë, ku protestuesit kanë bllokuar hyrjen e institucionit, duke sjellë përplasje me forcat e policisë.
Forca të shumta policie janë vendosur në perimetrin e Kryeministrisë, ndërsa efektivët kanë krijuar kordon sigurie për të mbajtur protestuesit larg hyrjeve të godinës. Pavarësisht pranisë së madhe të policisë, protestuesit po qëndrojnë përpara Kryeministrisë, madje edhe kanë tentuar të afrohen drejt hyrjes së institucionit. Përplasjet mes palëve kanë rritur tensionet në zonë.
Sipas raportimeve nga vendngjarja, brenda godinës ndodhet kryeministri Edi Rama, ndërsa situata jashtë vijon të mbetet e tensionuar. Protesta ka sjellë edhe bllokime të qarkullimit në disa prej akseve kryesore të kryeqytetit, ndërsa policia vijon të mbajë nën kontroll perimetrin përreth Kryeministrisë.
Gjatë tensioneve ishin të pranishëm edhe disa prej organizatorëve të protestës, mes të cilëve Dritan Goxhaj dhe Arben Kola, të cilët përmes megafonit kanë nxitur të pranishmit që të rrethojnë godinën e Kryeministrisë, apo edhe të qëndrojnë ulur, siç shihet në këtë foto.
Video nga përplasja