Plazhet publike, ministri Gonxhja: 675 stacione të reja dhe më shumë hapësira për pushuesit

1689 parcela ose stacione plazhi do të jenë me funksion dhe administrim publik në vitin 2026, ose 675 më shumë krahasuar me vitin 2025. Kështu shprehet ministri i Turizmit, Blendi Gonxhja, i cili thotë se numri i plazheve publike do të rritet me 67%, ndërsa do të zgjerohet edhe sipërfaqja në dispozicion të pushuesve.

Gonxhja shkruan se sipërfaqja totale e plazheve publike arrin në 3.18 milionë metra katrorë, nga 2.88 milionë metra katrorë në vitin 2025, ose 303 mijë metra katrorë më shumë. Sipas tij, një risi për vitin 2026 janë 124 parcela publike në administrim të bashkive, të pajisura me çadra dhe shezlongë me tarifa ekonomike të miratuara nga këshillat bashkiakë. Këto zënë një sipërfaqe prej 475 mijë metrash katrorë. Më shumë parcela do të ketë Lezha me 49, Durrësi me 38, Shkodra me 16, Himara me 11 dhe Vlora me 10.

Ministri bën të ditur gjithashtu se 665 parcela që më parë menaxhoheshin nga privatët janë kthyer në funksion publik si rezultat i mosaplikimit ose refuzimit të aplikimeve, duke i shtuar plazhit publik 768 mijë metra katrorë sipërfaqe. Gonxhja thotë se është zgjeruar edhe numri i plazheve përjashtimore, të cilat në vitin 2026 arrijnë në 22, nga vetëm 2 që ishin një vit më parë. Sipas tij, ato përfshijnë 570 parcela dhe rreth 1.42 milionë metra katrorë sipërfaqe plazhi të menaxhuar dhe të formalizuar.

“Lufta ndaj abuzivizmit të çmimeve përmes alternativës së re të plazhit me menaxhim bashkiak, me tarifa të miratuara në këshillat bashkiak dhe që rregullojnë tregun duke ofruar mundësi të përballueshme shërbimi e akses publik të garantuar, bashkë me formalizimin e plazheve dhe me fiskalizimin e pagesave, me rritjen e ndërgjegjësimit dhe masat e sigurisë në det e në vrojtim, kanë sjellë një rezultat pozitiv e të prekshëm për qytetarët dhe pushuesit, duke ulur kostot e mirëadministruar turizmin. Ka ende shumë për të bërë me kontrollin dhe ligjshmërinë edhe në plazhet liqenore e lumore, në zonat e mbrojtura e në ishuj, për standarde e protokolle të qendrueshme higjene, sigurie e aksesi të përballueshëm”,-thotë Gonxhja.