“Po talleni me shqiptarët”, opozita kërkon debat me mocion në Kuvend

Është mbledhur Kuvendi në seancë plenare, ku që në çelje PD ka kërkuar që të kalojë kërkesa e tyre për debat me mocion për programin qeverisës.

“Është e disata seancë që po talleni. Shqiptarët nuk mund të rrinë para ekranit dhe të shikojnë seanca përçudnuese 5-minutëshme, ndërkohë presin që kryeministri të flasë për programin e qeverisë”, u shpreh Flamur Noka.

“Do ndërpritet fjala nëse nuk jeni për procesverbalin”, tha kreu i Kuvendit, Niko Peleshi.

“Kam bërë kërkesë seancën e kaluar për rregulloren, e keni detyrim të na e vini në dispozicion. Neni 78, pika 2, i bën të pavlefshme mbledhjet e Kuvendit sepse nuk na keni vënë në dispozicion as propozimet dhe as rregulloren e ndryshuar që ju e keni  votuar. Ju bëj thirrje të shikoni rregulloren, se kërkesa jonë është e drejtë”, u shpreh deputeti i PD, Arjan Ndoja.

“Rregullorja e re, më konfirmojnë shërbimet e Kuvendit, është shpërndarë për të gjithë deputetet, dhe për me tepër është në faqen e Kuvendit. Po do rishpërndahet sot”, iu përgjigj Peleshi.