Protesta prej 36-të ditësh po ruan të njëjtin format: Pankarta, mesazhe, fjalime nga pjesëmarrës të ndryshëm dhe një marshim në rrugët e Tiranës. Kryeministri Edi Rama ka përsëritur se nuk ka ndërmend të japë dorëheqjen, pavarësisht kërkesave të protestuesve. Në reagimet e tij publike, ai ka theksuar se do të respektojë mandatin e marrë nga qytetarët deri në vitin 2029. Gjatë ditës së sotme, Rama publikoi edhe poezinë “Kundërshtarëve të mi” të Dritëro Agollit, një mesazh që u interpretua si përgjigje ndaj kritikëve dhe protestuesve.
Përsëritja e të njëjtit skenar në protestat e përditshme duket se ka nxitur diskutime mes pjesëmarrësve për hapat e ardhshëm të lëvizjes. Në tubimin e fundit, një prej protestueseve, e shoqëruar nga përfaqësues të grupit koordinues, kërkoi që energjia e krijuar gjatë këtyre javëve të mos mbetet vetëm në shesh, por të shndërrohet në një alternativë të re politike.
Synimi i protestës nuk është thjesht ndryshimi i partive në pushtet, por transformimi i sistemit politik të ndërtuar gjatë 35 viteve të fundit. Ajo propozoi organizimin e protestuesve në një ose më shumë lëvizje që më pas të formalizohen si parti politike, duke krijuar një “pol të tretë” në skenën politike shqiptare. Ky qëndrim vjen në një kohë kur brenda protestës po shtohen zërat që kërkojnë organizimin e një kuvendi kombëtar, me synimin për të diskutuar krijimin e një qeverie tranzitore dhe një platforme të re politike.
