Posta Shqiptare e hapur deri në orën 14:00, mundësi për të tërhequr pensionet dhe shpërblimin e fundvitit 2025

Drejtori i Përgjithshëm i Institutit të Sigurimeve Shoqërore (ISSH), Astrit Hado, njoftoi sot se, për shkak të fluksit të lartë të kërkesave për tërheqjen e pensioneve dhe të shpërblimit të fundvitit 2025, sistemi i pagesave të pensioneve është mbajtur i hapur në mënyrë të përkohshme edhe gjatë ditës së sotme.
Sipas ISSH-së, në zbatim të vendimit të Këshillit të Ministrave “Për shpërblimin e pensionistëve për festat e fundvitit 2025”, data 30 qershor 2026 është afati i fundit brenda të cilit përfituesit mund të tërheqin shumën e shpërblimit.
Për t’u ardhur në ndihmë qytetarëve që nuk kanë mundur ta kryejnë ende këtë procedurë, të gjitha qendrat e Postës Shqiptare në vend do të qëndrojnë të hapura edhe gjatë ditës së sotme, deri në orën 14:00.
Astrit Hado bëri të ditur se ky vendim është marrë për të shmangur humbjen e afatit nga pensionistët dhe për të garantuar që çdo përfitues të ketë mundësinë të marrë si pensionin, ashtu edhe shpërblimin e fundvitit.
Instituti i Sigurimeve Shoqërore u ka bërë një thirrje të gjithë pensionistëve që nuk e kanë tërhequr ende shpërblimin, të paraqiten pranë qendrave paguese të Postës Shqiptare brenda orarit të përcaktuar, pasi me përfundimin e datës 30 qershor 2026 përfundon edhe afati zyrtar për tërheqjen e këtij përfitimi.
Autoritetet u kërkojnë qytetarëve të mos e lënë procedurën për momentet e fundit, në mënyrë që të shmangen radhët dhe vonesat, ndërsa stafi i Postës Shqiptare dhe ISSH-së do të jetë në dispozicion për të garantuar mbarëvajtjen e procesit deri në mbylljen e orarit zyrtar në orën 14:00.