Presidenti Begaj vizitë në komunat arbëreshe të Molises: “Shqipëria–Italia–Arbëria”

Presidenti i Republikës, Bajram Bega ka zhvilluar një vizitë zyrtare në komunat arbëreshe të rajonit Molise në Itali,  ku u prit me nderime të larta nga përfaqësuesit më të lartë të institucioneve vendore. Vizita u fokusua në forcimin e lidhjeve historike, kulturore dhe njerëzore mes Shqipërisë dhe Italisë, me komunitetet arbëreshe si urë të gjallë të kësaj miqësie.

Gjatë takimeve me autoritetet e rajonit Presidenti Begaj vlerësoi frymën e bashkëpunimit që karakterizon marrëdhëniet mes dy vendeve:

“Kënaqësi të takohem me autoritetet e larta të Rajonit të Molises. Çdo takim me autoritetet italiane mbart frymën e miqësisë që ka shoqëruar marrëdhëniet tona ndër vite – në politikë,  ekonomi,  kulturë,  arsim,  shëndetësi e më gjerë”- tha Begaj.

Ai theksoi se komunitetet arbëreshe dhe diaspora e re shqiptare kanë dhënë një kontribut të posaçëm në ruajtjen dhe forcimin e këtyre lidhjeve.

Presidenti Begaj prezantoi vizionin e tij për projektin “Shqipëria–Italia–Arbëria”, si një nismë që synon të përforcojë partneritetin strategjik mes dy vendeve dhe të nxisë bashkëpunime të reja në fusha me interes të ndërsjellë.