Propozimi i PS për “Territorialen”. Bashkia Klos në protestë, kundër shkrirjes me Matin

Administrata e bashkisë Klos ka bojkotuar punën në shenjë proteste për propozimin e PS për hartën e re territoriale. Sipas hartës, bashkia e Klosit do të shkrihet me atë të Matit.

Protestuesit kanë paralajmëruar se do të vijojnë aksionin deri në marrjen e një vendimi tjetër nga institucionet përgjegjëse.

Në hartën e propozuar nga socialistët, qarku Dibër rezulton me 3 bashki: Dibër, Bulqizë e Mat, 7 qytete dhe 35 njësi administrative.

Reagime të ngjashme janë paralajmëruar edhe në Belsh dhe Prrenjas, dy bashki të tjera që sipas propozimit të mazhorancës pritet të përfshihen në procesin e shkrirjes.

Një ditë më parë, protesta u zhvilluan edhe në Poliçan, ku disa qytetarë të lidhur me Partinë Socialiste dogjën teserat e anëtarësisë, ndërsa kreu i PS-së në këtë qytet dha dorëheqjen përpara protestuesve.