Dita e 29- e protestës ka vijuar e qetë duke u u mblodhën fillimisht në sheshin “Skënderbej”, prej nga marshuan drejt godinës së Kryeministrisë. Gjatë tubimit u dëgjuan thirrje kundër qeverisë, ndërsa organizatorët ritheksuan kërkesat e tyre.
Në emër të Grupit Koordinues, Andi Tepelena paraqiti kërkesat e protestës, duke deklaruar se ato janë të panegociueshme.
Sipas tij, kërkesa e parë është dorëheqja e kryeministrit dhe e qeverisë, ndërsa protestuesit kërkojnë gjithashtu krijimin e një qeverie teknike dhe tranzitore me mandat 12-mujor.
Një tjetër kërkesë lidhet me ndryshime kushtetuese dhe ligjore, të cilat, sipas organizatorëve, duhet të miratohen përmes referendumit popullor. Mes tyre përfshihen ndryshimi i Kodit Zgjedhor, ndryshimi i ligjit për financimin e partive politike dhe kufizimi i mandatit të kryeministrit në jo më shumë se dy mandate gjatë jetës.
Grupi Koordinues kërkoi gjithashtu shfuqizimin e ndryshimeve në ligjin për zonat e mbrojtura dhe në ligjin për trashëgiminë kulturore, shfuqizimin e paketës ligjore të njohur si “Pakti i Maleve”, si dhe heqjen e kuadrit ligjor për investimet strategjike.
Organizatorët kërkuan edhe hartimin e një kontrate të re sociale mes qytetarëve dhe shtetit, e cila, sipas tyre, duhet të përgatitet pas konsultimit me ekspertë, intelektualë dhe qytetarë.
Më herët, një prej anëtarëve të Grupit Koordinues, Përparim Gjeka, publikoi një dokument që e cilësoi si platformë politike të protestës, ku propozohet krijimi i institucioneve të reja shoqërore për ndryshimin e sistemit politik.
Gjatë fjalës së mbajtur në tubim, një prej qytetarëve tha se protesta ka rrëzuar paragjykimet se shqiptarët nuk bashkohen për kauza të përbashkëta, duke theksuar se qëndresa disamujore ka forcuar besimin mes qytetarëve.
Folës të tjerë e morën fjalën në këtë tubim, të cilët u mbështetën nga të pranishëm që buçisnin në kor thirrjet dhe kërkesat e tyre tashmë të shumënjohura.
AV / KJ