Protesta e PD, deputeti Xhaferri: Paratë tona po shkojnë për tendera sekretë dhe koncesione fantazmë

Deputeti i PD-së, Besart Xhaferri ka lëshuar akuza të forta ndaj qeverisë dhe duke bërë thirrje për reagim qytetar, në fjalën e mbajtur në podiumin përballë Kryeministrisë në këtë protestë të PD-së. Deputeti akuzoi qeverinë se e ka kthyer vendin në pronë private dhe se fondet publike po keqpërdoren. “Paratë tuaja nuk shkojnë për shkolla më të mira, për spitale ku gjen shërim, as për rrugë e siguri publike. Shkojnë në xhepat e një grushti personash përmes tenderave sekretë dhe koncesioneve fantazmë,” u shpreh ai.

Në vijim, Xhaferri theksoi se problemi nuk është varfëria, por korrupsioni. ”Shqipëria nuk është e varfër, është e vjedhur. Nuk mund t’ia lëmë atdheun tonë atyre që e trajtojnë si plaçkë tregu”. Ai u bëri thirrje qytetarëve që të reagojnë dhe të mos pranojnë situatën aktuale, duke theksuar se vendi ka potencial për zhvillim. “Ne kemi inteligjencën, forcën dhe arsimimin që ta bëjmë Shqipërinë të denjë për familjet tona”.

Xhaferri kërkoi zgjedhje të lira dhe të ndershme, duke i bërë thirrje qytetarëve të mos kenë frikë. ”Duhet të shembim murin e pandëshkueshmërisë dhe të ngremë një rebelim kundër të keqes që na ka zënë frymën. Mos kini frikë nga makineria e tyre e propagandës”.