Protestoi i vetëm në shesh, qytetari ironizon banorët e Përrenjasit: Faleminderit që na shihni nga kafja

Një protestë e paralajmëruar në Përrenjas përfundoi duke u kthyer në tubimin më të qetë të mundshëm, me vetëm një pjesëmarrës. Banori që iu përgjigj thirrjes për t’u mbledhur në shesh gjeti përballë jo turmën e pritur, por hapësirën bosh. Megjithatë, ai nuk e humbi humorin. Me ironi, deklaroi se duket se qyteti nuk vuan nga asnjë hall apo problem, pasi askush nuk e pa të arsyeshme të bashkohej në protestë.

”Në fakt s’keni ardhur po s’ka problem, erdhëm ne. Erdhëm t’ju përshëndesim, thamë që si gjithë Shqipërinë ta organizonim një protestë dhe këtu në Përrenjas. Unë jam bir i kësaj ane. Po me sa duket ju s’paskeni halle dhe probleme fare. Unë kisha bërë mend që t’i thosha ca fjalë Nuriut, po s’ja them dot se ju qenkeni të gjithë në punë.

Megjithatë ne ju falenderojmë shumë, që na shikoni dhe nga kafja kështu. Patjetër që do falenderojmë policinë e shtetit. Faleminderit shumë. Edhe diçka doja t’ju thoja. Nëse ndokush ju pyet, se pse, nga ishte Vilson Blloshmi apo Genc Leka apo Petrit Blloshmi, mos i tregoni që ishte nga kjo anë. Sepse ata do të dridhen në varr. Mos i tregoni se ata dhanë jetën për këtë anë. Ju faleminderit”, u shpreh qytetari.