PS-PD bashkohen për Integrimin, Lapaj: Parlamenti humbi legjitimitetin kur u kthye në barrikadë kundër drejtësisë

Kreu i ”Shqipëria Bëhet”, Adriatik Lapaj komenton PS-PD që sot bashkuan votat për miratimin me konsensus të projektrezolutës për procesin e anëtarësimit të Shqipërisë në Bashkimin Europian. I ftuar në News 24, ai tha se Parlamenti ka pasur vetëm një moment që mund të justifikonte ekzistencën e vet, kur votoi për kërkesën e SPAK për heqjen e imunitetit të Belinda Ballukut.

”Ai Parlament ka pasur vetëm një moment që mund të justifikonte ekzistencën e vet dhe ajo ka qenë çështja e imunitetit të Belinda Ballukut. Ditën që ai Parlament u kthye në mburojë për të mbrojtur Ballukun dhe rrëzoi Prokurorinë e Posaçme, ka humbur çdo lloj legjitimiteti sepse statistikat thonë këtë.

Pra siç e do Edi Rama, shkon, miratohet, votohet, asnjë nen nuk ndryshon, nuk dëgjohet për t’u ndryshuar. Kishte vetëm një moment që mund të diskutohej vlefshmëria e tij, ishte momenti për t’u rreshtuar krah drejtësisë. Në atë moment dëshmuan se nuk ishin, por u bënë barrikadë e drejtësisë.

Unë kam qenë për herë të parë mbi integrimin kur kam qenë në klasë të dytë. Kam qenë shumë i vogël, tani kanë kaluar dekada të njëjtat muhabet dëgjoj unë. Të njëjtët njerëz, të njëjtat muhabetet. “Do integrohemi, bëhet dhe një parti me emrin integrim, kalohet ai moment, vjen një tjetër, bëhet një qeveri me emrin integrim, ikën ajo qeveri, pastaj një parlament që bashkohet për integrimin. Vetëm integrim nuk ka këtu, vetëm çintegrim”.