Qarkullimi i monopatinave? Ministrja Koçiu: S’ka asnjë vendim për heqjen e masës së ndalimit

Ministrja e Brendshme, Albana Koçiu ka reaguar lidhur me situatën e qarkullimit të monopatinave në vend. Koçiu sqaron se udhëzimi për ndalimin e qarkullimit të patinave është në fuqi dhe se nuk ka asnjë vendin për heqjen e masës së ndalimit.

Postimi i plotë

E PAVËRTETË! Udhëzimi për ndalimin e qarkullimit me monopatina mbetet në fuqi. Nuk ka asnjë vendim për heqjen e masës së ndalimit të përkohshëm. Policia e Shtetit vijon angazhimin e përditshëm në terren për garantimin e zbatimit të plotë të këtij udhëzimi, në përputhje me njoftimet zyrtare të bëra më herët.

Shpreh mirënjohje për qytetarët për bashkëpunimin dhe mirëkuptimin në respektimin e kësaj mase, e cila synon mbrojtjen e sigurisë dhe jetës, në veçanti të të rinjve.

Të dhënat e Policisë së Shtetit dhe të shërbimeve të traumës konfirmojnë një rënie të ndjeshme të numrit të aksidenteve gjatë periudhës së zbatimit të saj.

Ministria e Punëve të Brendshme, në bashkëpunim me institucionet përgjegjëse, po vijon vlerësimin e situatës për të përcaktuar vendimmarrjen më të drejtë, duke vendosur në qendër të çdo hapi sigurinë dhe jetën e çdo qytetari.