Qytetarët dhe punonjësit e bashkisë së Rrogozhinës kundër draftit të PS: Duam investime nga qeveria, jo të shkojmë në Kavajë

Qytetarë dhe punonjës të Bashkisë Rrogozhinë dolën këtë të hënë në protestë kundër draftit të propozuar nga PS për reformën e re territoriale, i cili parashikon shkrirjen e Bashkisë Rrogozhinë dhe bashkimin e saj me Bashkinë e Kavajës. Në shenjë kundërshtimi, punonjësit e bashkisë, e cila drejtohet nga socialistët, bojkotuan edhe procesin e punës, ndërsa protestuesit theksuan se ruajtja e Rrogozhinës si bashki më vete lidhet jo vetëm me ofrimin e shërbimeve, por edhe me identitetin e qytetit.

“Unë si qytetar i Rrogozhinës jam kundër kësaj reforme sepse Bashkia Rrogozhinë nuk i plotëson kushtet dhe kriteret që ka vendosur qeveria që të shkrihet si bashki dhe të bashkohet me Kavajën. Ne si Bashki kemi arritur shumë. Plazhë i Vilë Bashtovës ka marrë emër, kalaja e Bashtovës gjithashtu, plazhi i Spillesë është i paprekur. Ne kërkojmë investimet e qeverisë këtu jo bashkimin e Kavajës. Kush na siguron ne që duke u bashkuar me Kavajën do rriten shërbimet për qytetarët e Rrogozhinës? Është e papranueshme që Bashkia të shkrihet. Kjo nismë është kundër ccdo parimit tonin. Identiteti ynë humbet”, tha një qytetar.

Një tjetër banor u shpreh se protesta po zhvillohet për të tretën ditë radhazi dhe i bëri thirrje institucioneve më të larta të shtetit që të mos miratojnë shkrirjen e bashkisë. “Ne jemi në ditën e tretë të protestës qytetare. Pavarësisht nga problemet e Bashkisë Rrogozhinë, kjo protestë organizohet vetëm për shërbimet ndaj qytetarëve që e kryen vetë Bashkia Rrogozhinë. Bashkia Rrogozhinë e kryen shërbimet për qytetarët e saj. Nuk mund të bashkohemi me Kavajën. Bashkia e Kavajë nuk mund ta rregullojë Bashkinë e Rrogozhinës. Do jemi më keq, dhe shërbimet ndaj qytetarit do të jenë minimale. Kërkoj nga ana e Kryeministrit, presidentit të Republikës dhe Komisionit të Reformës Territoriale ta shikojnë me vëmendje Bashkinë Rrogozhinë si aset, si virtyt e të ardhme për qytetarinë”, tha ai.

Edhe një protestues tjetër vuri theksin te potenciali turistik i zonës, duke kërkuar më shumë investime dhe jo bashkim me një bashki tjetër. “Ne si Bashki po arrijmë gjëra të mira, kemi plazhin dhe Kalanë e Vilë Bashtovës dhe plazhin e Spillesë. Ne kemi nevojë për investime nga qeveria dhe jo Bashkim me Kavajën. Kush na siguron ne që qytetarët do të marrin shërbime nga Kavaja? Ne nuk jemi dakord të shkrihemi si Bashki”, tha një tjetër protestues.

Drafti i PS-së propozon uljen e numrit të bashkive në vend nga 61 në 46, duke parashikuar shkrirjen e 15 njësive vendore, mes tyre edhe Bashkisë Rrogozhinë. Projektligji është depozituar në Kuvend me firmat e deputetëve socialistë, pasi mazhoranca dhe opozita nuk arritën të gjenin konsensus në Komisionin e Posaçëm për Reformën Territoriale.