Rama dënon sulmet e Iranit ndaj Emirateve: “Raketime urrejtjeje kundër një oaze paqeje si Dubai”

“Sulmet e pamatura dhe të dëshpëruara të regjimit iranian ndaj Emirateve të Bashkuara Arabe nuk përbëjnë vetëm një agresion kundër një shteti sovran, por godasin drejtpërdrejt stabilitetin, zhvillimin dhe vizionin për një Lindje të Mesme të ndërtuar mbi paqen dhe bashkëpunimin, jo mbi konfliktin. Të vësh në shënjestër një qendër si Dubai, e njohur si simbol i sigurisë dhe progresit, me raketa dhe kërcënime, nxjerr në pah natyrën destabilizuese të pushtetit në Teheran. Këto veprime pasqyrojnë një sistem që, përballë dështimeve të brendshme, zgjedh të eksportojë tension dhe dhunë, duke përdorur frikën si mjet presioni, si ndaj fqinjëve, ashtu edhe ndaj vetë popullit të tij.

Emiratet e Bashkuara Arabe janë shndërruar në një shembull ndërkombëtar të zhvillimit ekonomik, dialogut ndërkulturor dhe bashkëjetesës fetare. Ato përfaqësojnë një model modern për rajonin: një hapësirë të sigurt, të hapur ndaj botës dhe me vizion afatgjatë. Goditja ndaj tyre është një goditje ndaj vetë idesë së një rajoni që zgjedh ndërtimin në vend të shkatërrimit dhe partneritetin në vend të përplasjes.

Shqipëria shpreh mbështetje të plotë dhe të palëkundur për udhëheqjen dhe popullin e Emirateve të Bashkuara Arabe. Stabiliteti në Gjirin Persik ka rëndësi globale, pasi çdo përpjekje për ta cenuar atë prek jo vetëm sigurinë rajonale, por edhe ekuilibrat ndërkombëtarë, rrugët tregtare dhe furnizimin energjetik.

Është e domosdoshme që komuniteti ndërkombëtar të reagojë me një zë të qartë dhe të bashkuar kundër çdo forme agresioni shtetëror dhe sulmesh ndaj objektivave civile. E ardhmja e rajonit nuk mund të ndërtohet mbi raketa dhe kërcënime, por mbi respekt të ndërsjellë, integrim ekonomik dhe udhëheqje të përgjegjshme. Nën drejtimin e Presidentit Mohammed bin Zayed Al Nahyan, Emiratet e Bashkuara Arabe kanë zgjedhur rrugën e stabilitetit dhe progresit. Ata që përqafojnë destabilizimin dhe shkatërrimin rrezikojnë të mbeten të izoluar përballë një bote që mbështet paqen, bashkëpunimin dhe zhvillimin”:Reagon Rama