Kryeministri Edi Rama, gjatë një prezantimi informues mbi situatën në akset rrugore të prekura nga reshjet intensive të dëborës, ka bërë me dije se vendi po përballet me kushte të vështira atmosferike, por se strukturat përgjegjëse janë në gatishmëri të plotë dhe në veprim të pandërprerë.
Sipas tij, ekipet e Autoritetit Rrugor Shqiptar ndodhen në terren 24 orë në ditë, duke punuar pa ndërprerje, ditë e natë, me qëllim mbajtjen e akseve kryesore dhe dytësore të hapura, si dhe garantimin e sigurisë së çdo qytetari që qarkullon në rrugë. Ky angazhim intensiv synon të minimizojë pasojat e motit ekstrem dhe të sigurojë vazhdimësinë e lëvizjes, veçanërisht në zonat më problematike.
Kryeministri u ka bërë thirrje drejtuesve të mjeteve që të tregojnë kujdes të shtuar, të respektojnë rregullat e qarkullimit rrugor, të ulin shpejtësinë dhe të pajisen domosdoshmërisht me goma dimërore dhe zinxhirë, në mënyrë që të shmangen rreziqet dhe incidentet e mundshme.
Në funksion të përballimit të situatës janë angazhuar 130 mjete borëpastruese, si dhe 577 mjete të tjera ndihmëse, ndërsa në terren punojnë rreth 800 punonjës. Deri më tani janë hedhur në rrugë rreth 5 300 ton kripë dhe 1 800 ton granil, si masa parandaluese dhe ndërhyrëse për të garantuar kalueshmërinë dhe sigurinë e akseve rrugore.
Kjo panoramë dëshmon një mobilizim të gjerë dhe të koordinuar të të gjitha strukturave shtetërore, të angazhuara për të përballuar situatën e krijuar nga reshjet e dëborës dhe për të normalizuar sa më shpejt lëvizjen e mjeteve në rrugët e prekura, duke vendosur në qendër sigurinë dhe interesin e qytetarëve.
AV/KJ