Rama jep lajmin: Tre trajnerët e parë shqiptarë certifikohen nga Manchester City

Tre trajnerët e parë shqiptarë kanë përfunduar me sukses programin e akreditimit të Manchester City, duke u bërë të parët në Shqipëri të certifikuar për të zbatuar metodologjinë dhe standardet e klubit anglez në zhvillimin e futbollistëve të rinj.

Lajmi u bë i ditur nga kryeministri Edi Rama, i cili e cilësoi këtë si një arritje të rëndësishme për futbollin shqiptar. Sipas tij, certifikimi përfaqëson një hap të ri drejt rritjes së cilësisë së trajnimit të moshave dhe krijimit të mundësive për zhvillimin e talenteve sipas praktikave të një prej klubeve më të suksesshme në futbollin europian.

”Sot shënojmë një arritje të rëndësishme: tre trajnerët e parë shqiptarë kanë përfunduar me sukses programin e akreditimit të Manchester City dhe janë tashmë të certifikuar për të zbatuar metodologjinë dhe standardet e klubit anglez në zhvillimin e brezit të ri të futbollistëve”,-shkruan Rama.

Programi i akreditimit u mundëson trajnerëve të aplikojnë metodat e punës dhe standardet profesionale të Manchester City në përgatitjen e brezit të ri të futbollistëve, duke synuar rritjen e nivelit të akademive dhe futbollit të të rinjve në Shqipëri.