Kryeministri Edi Rama gjatë fjalimit për 35-vjetorin e PS-së, është rikthyer tek detyra si kryebashkiak i Tiranës për mbrojtjen e mjedisit. Ai tha se mbi 90% e pemëve në Tiranë, janë mbjellë në kohën kur ai ishte kryetar bashkieku edhe shtoi se la pas 55 mijë rrënjë pemë dekorative, të mbjella sipas tij me sherr, pasi duheshin prishur kjoskat dhe ndërtimet pa leje.
”E vërteta është se dallimi mes meje dhe kujtdo në atë bashkësi protestuesish që i përket kësaj kategorie nuk është siç duket nga Bulevardi. Edhe unë mendoj për jetën e banorëve të tokës, brishtësinë e mjedisit përballë veprimeve të njerëzve me pushtet. Që kur kam shkelur në zyrën e parë të shtetit, kam bërë sa kam mundur kundër pisllëkut dhe në favor të pastërtisë. Shumë prej atyre që janë në Bulevard apo që i mbështesin nga rrjetet sociale janë shumë të rinj për të kujtuar Tiranën e 20 viteve më parë, kur morëm drejtimin e Bashkisë së kryeqytetit, kur kishte më shumë pemë të prera sesa të mbjella.
Mbi 90% e pemëve që shihen në rrugët e Tiranës i kemi mbjellë së bashku me disa të tjerë që janë këtu, në kohën kur si kryetar bashkie dola nga zyra duke lënë pas 55 mijë rrënjë pemësh dekorative. Shumë prej atyre pemëve të larta kanë qenë fidanë të mbjellë me sherr, pasi duheshin shembur kioskat. Vetëm në skarpatet e Lanës janë hequr 123 mijë ton beton. Që atëherë kam mësuar se në këtë vend nuk mund të hedhësh një hap për të ecur përpara pa bërë një sherr që të kthen pas. Që atëherë më flet në vesh Faik Konica, i cili thotë: “Bëj durim, sepse shqiptari e ka zakon të kundërshtojë pa marrë vesh”,-tha Rama.
