Rama ndan pamje nga inaugurimi i Konsullatës së Nderit në Napoli, tregon dhuratën e veçantë

Kryeministri Edi Rama ka vijuar vizitën e tij në Napoli, ku mori pjesë në ceremoninë e inaugurimit të Konsullatës së Nderit të Republikës së Shqipërisë dhe zhvilloi një sërë takimesh me përfaqësues të institucioneve akademike italiane. Përmes një albumi fotografik të publikuar në rrjetet sociale, Rama ka ndarë momente nga vizita, mes tyre edhe takimet me rektorë universitetesh dhe përfaqësues të institucioneve që merren me studimet shqiptare.

Një prej ndalesave të tij ishte Katedra e Gjuhës Shqipe pranë Universitetit “L’Orientale” në Napoli, një institucion me një traditë të gjatë në fushën e albanologjisë dhe në studimin e gjuhës, letërsisë dhe kulturës shqiptare. Gjatë bashkëbisedimit me stafin akademik, Rama u ndal te rëndësia e kësaj tradite, duke propozuar krijimin e një rrjeti më të organizuar që do të mundësonte bashkëpunim më të ngushtë dhe mbështetje më të strukturuar për studimet shqiptare.

“Ta krijojmë një lloj rrjeti këtu në universitet, me idenë që më pas të mund të ndihmojmë në mënyrë më të strukturuar dhe gjithashtu ta përdorim për të ruajtur e për të shfrytëzuar më mirë gjithçka që prodhohet këtu”, deklaroi Kryeministri.

Sipas tij, një qasje e tillë do të shërbente jo vetëm për ruajtjen e trashëgimisë së krijuar ndër vite, por edhe për ta bërë më të aksesueshme dhe më të dobishme atë që prodhohet nga kërkimi akademik në fushën e albanologjisë. Gjatë qëndrimit në Napoli, Kryeministri mori gjithashtu një dhuratë simbolike, një statujë të tij në miniaturë.

Vizita u zhvillua në kuadër të forcimit të bashkëpunimit mes Shqipërisë dhe Italisë, ndërsa hapja e Konsullatës së Nderit synon të krijojë një pikë të re lidhëse për komunitetin shqiptar dhe për promovimin e interesave shqiptare në zonën e Napolit.