Kryeministri Edi Rama pritet të jetë nesër në Korçë, ku do të zhvillojë takimin e radhës në kuadër të konsultimeve për rishikimin e ndarjes administrative-territoriale të vendit. Në qendër të vëmendjes në juglindje pritet të jetë Bashkia Maliq, e cila sipas një prej propozimeve të PS-së do të shkrihet dhe do t’i bashkohet Bashkisë Korçë.
Ideja ka shkaktuar reagime të forta në Maliq. Kundërshtimet janë shoqëruar edhe me protesta, ndërsa zëra kundër këtij ndryshimi janë dëgjuar edhe nga punonjës të administratës vendore. Këshilli Bashkiak i Maliqit nuk ka miratuar ende një qëndrim zyrtar kundër shkrirjes së bashkisë. Situata është bërë pjesë e diskutimeve edhe brenda këshillit, ku këshilltarët e Partisë Demokratike kanë kërkuar miratimin e një qëndrimi kundërshtues.
Këshilltarët socialistë kanë kërkuar kohë shtesë për t’u njohur dhe për të shqyrtuar në detaje propozimin. Të njëjtin qëndrim ka mbajtur edhe kryetari i Bashkisë Maliq, Gëzim Topçiu, i cili ka kërkuar që këshilli të ketë më shumë kohë përpara se të shprehet për ndryshimet e propozuara.
Fokusi zhvendoset te takimi i së mërkurës në Korçë, ku kryeministri Rama pritet të prezantojë propozimet për hartën e re administrative dhe t’i diskutojë ato me banorët dhe përfaqësuesit vendorë. Takimi do të mbahet në orën 09:30 në teatrin ”Andon Zako Çajupi”. Mbetet për t’u parë nëse propozimi për shkrirjen e Bashkisë Maliq do të kthehet në një nga temat kryesore të debatit gjatë konsultimit publik.