Kryeministri Edi Rama ka folur në lidhje me projektin që do të realizohet në Zvërnec, ku deklaroi se është hedhur baltë, sikur shteti po fal tokë.
“Ndjesë nëse jam shumë i drejtpërdrejtë, ndoshta edhe emocional, por kjo është ndjesia ime. Janë ditë të habitshme që, për herë të parë, më kanë bërë të mendoj t’ju përulem thellë, të largohem në katund dhe t’ju lë në duart e atyre që do të zgjidhnit.
Por unë kam zgjedhur t’ju udhëheq drejt asaj Shqipërie që e dua po aq sa e doni edhe ju dhe t’ju udhëheq për ta përmbyllur atë që kemi nisur falë votës suaj. Dua që ta bëjmë Shqipërinë një vend për t’u pasur zili në rajon, dhe ky projekt është pjesë e kësaj përpjekjeje.
Zgjodha t’ju tregoj anën tjetër të medaljes, edhe me rrezikun që të mos më besoni. Kur kam hyrë në atë zyrë, kam thënë se zyra është e imja, ndërsa pushteti është i juaji. Nuk kam premtuar se nuk do të bëjmë gabime, por kam premtuar një gjë: se nuk do t’ju tradhtoj kurrë!”, tha Rama.
Ndër të tjera, në fjalën e tij në mbledhjen e Grupit Parlementar të PS, Rama u shpreh se në media është përhapur një helm sikur toka do i falet Izraelit për të sjellë palestinezë, apo do shkatërrohet biodiversiteti.
“Ju mirëkuptoj dhe, duke pasur parasysh atë që ju është thënë se ka ndodhur, edhe unë do të kisha reaguar më ashpër se ju po të më thoshin se ajo tokë është e shtetit dhe se po u falet të huajve.
Është përhapur me dashakeqësi edhe legjenda se shteti po ia fal atë tokë Izraelit për të sjellë palestinezë në Zvërnec. Po ashtu, është thënë se ajo është zonë e mbrojtur dhe se qeveria e ka hequr këtë status, që të vijnë investitorë për të shkatërruar biodiversitetin e zonës, e shumë të tjera nga ato që ju janë thënë, që më pas i keni përcjellë edhe ju, duke ngritur dallgë zemërimi.
Pikërisht sepse e kuptoj shumë mirë zemërimin tuaj, prej dy ditësh e pyes veten: a duhet t’jua tregoj, një për një, anën tjetër të kësaj medaljeje?
Fëmijët e Shqipërisë do të jenë përfituesit e këtij investimi dhe të investimeve të tjera të kësaj natyre. Përse e bëj unë këtë? Baltën që marr në fytyrë nga kundërshtarët politikë dhe mediatikë e kam duruar dhe do ta duroj, sepse këtë mision e mbaj në emër të shumëkujt prej jush.
Çfarë më duhet mua karrigia, çfarë më duhet pushteti, nëse duhet të heq dorë nga vizioni që kam?”, theksoi ai.