Kryeministri Edi Rama prezantoi këtë të hënë Programin Kombëtar për Përgatitjen e Biznesit për Integrimin në Bashkimin Europian, një nismë që synon të ndihmojë sipërmarrjet shqiptare të përshtaten me standardet e Tregut Unik Europian.
Kryeministri tha gjithashtu se është dyfishuar financimi për të rinjtë që kanë aplikuar në programin Start Up Albania, pasi këtë vit janë regjistruar mbi 1200 aplikime.
Kreu i qeverisë bëri të ditur gjithashtu se është dyfishuar fondi për startup-et, pas rritjes së numrit të aplikimeve, ndërsa synimi i programit është të informojë rreth 48 mijë biznese, të organizojë qindra trajnime, të rrisë certifikimin sipas standardeve të Bashkimit Europian dhe të përmirësojë konkurrueshmërinë e sipërmarrjeve shqiptare.
“Ne nuk do të ndalemi te një kuotë financimi. Nuk do të ketë asnjë sipërmarrje që do të paraqesë një plan të besueshëm e që nuk do të mbështetet financiarisht.
Një tjetër aspekt i këtij rrugëtimi është rritja dhe fuqizimi i ekosistemit të startup-eve. Kemi dyfishuar fondin e financimit për të rinjtë që kanë aplikuar në këto programe. Aplikimet këtë vit kanë kaluar mbi 1 200 dhe ne e kemi dyfishuar financimin. U kemi thënë të rinjve se do ta rrisim financimin në mënyrë proporcionale me numrin e aplikimeve.
Çfarë synojmë me këtë program në aspektin e shtrirjes? Duam të informojmë 48 mijë ndërmarrje në të gjithë vendin. Duam të ngremë një platformë për mbështetjen e biznesit. Në këtë do të na ndihmojë edhe mbështetja e UNDP-së. Gjithashtu, duam të organizojmë një cikël me qindra trajnime, të rrisim certifikimin sipas standardeve të BE-së dhe, në fund, konkurrueshmërinë e sipërmarrjeve.
Kemi nevojë për dije. Sipërmarrja ka nevojë për dije. Ky proces, mbi të gjitha, kërkon që të gjithë së bashku të jemi më të informuar.
Anëtarësimi në BE do të thotë që Shqipëria bëhet sa BE-ja dhe BE-ja bëhet sa Shqipëria. Nuk je më sipërmarrës vetëm brenda kufijve të Shqipërisë, por brenda tregut të Bashkimit Evropian.
Ne duam t’u japim kompanive sa më shumë instrumente në dispozicion për ta fituar këtë sfidë. Ndërkohë, Ministria e Ekonomisë dhe Inovacionit do të përgatisë një faqe interneti të dedikuar për këtë program, me qëllim mbajtjen e sipërmarrjeve të informuara”, tha ndër të tjera Rama.