Një debat i ri është ndezur në rrjetet sociale lidhur me banjat termale të Bënjës në Përmet, pas pretendimeve se zona po dëmtohet nga ndërhyrje ndërtimore dhe betonizim.
Kryeministri Edi Rama i cilësoi këto akuza si një “alarm digjital të shpërndarë në rrjet”, duke pretenduar se bëhet fjalë për një keqinformim të qëllimshëm që po amplifikohet në rrjete sociale. Sipas tij, pamjet dhe diskutimet që qarkullojnë nuk pasqyrojnë realitetin në terren.
Rama deklaron se në Bënjë nuk ka “shkatërrim apo betonizim të natyrës”, por një projekt publik rigjenerimi në kuadër të programit të Rilindjes Urbane, i cili synon përmirësimin e infrastrukturës dhe lehtësimin e aksesit për vizitorët dhe turistët që frekuentojnë zonën gjatë gjithë vitit.
Postimi i plotë
Prej 24 orësh është lëshuar një tjetër “raketë” digjitale, që algoritmi e ka shpërthyer në qindra mijëra lajke e mallkime, për shkatërrimin, betonizimin dhe tharjen e Banjove Termale të Bënjës.
Me të njëjtën metodë dhe me “ndihmën” e të njëjtave duar të huaja, që i dhanë algoritmit “dopingun” për një turravrap të paparë në përhapjen e alarmit për flamingot, organizatorët e kësaj trazire që synon të rrëzojë qeverinë e të kthejë mbrapa Shqipërinë, duke manipuluar njerëzit që kanë shqetësime të sinqerta, kërkojnë ta kthejnë Bënjën në një casus belli të ri.
Kush do të vërtetën e ka në këtë video, SOT, nga Banjot e Bënjës, ku s’ka flamingo, s’ka shitblerje, s’ka pronarë e as konflikte pronësie, po ka thjesht një projekt publik rigjenerimi e Rilindjeje Urbane, në funksion të mijëra e mijëra vizitorëve e turistëve që shkojnë aty çdo vit.