Kryeministri Edi Rama ka publikuar informacione për njërin prej 13 firmëtarëve të protestës, duke e shoqëruar me një listë procedimesh penale që, sipas tij, i përkasin këtij personi. “Njihuni me kontributin mbresëlënës për atdheun të njërit prej 13 flamurtarëve firmëtarë të protestës së bulevardit, ku sorrat dhe korbat i kanë marrë përfundimisht peng flamingot, nën maskën e ‘Shqipërisë së Re’.”
Më tej, ai rendit një sërë procedimesh, që sipas postimit datojnë nga viti 2014 deri në vitin 2022, për vepra të ndryshme të dyshuara, përfshirë rrahje, vjedhje energjie, kanosje, pengim të autoriteteve gjatë një aksioni për prishjen e një ndërtimi të paligjshëm dhe dhunë në familje.
Kryeministri nuk publikon emrin e personit në këtë postim dhe as dokumentacion zyrtar që të mbështesë pretendimet e bëra. Deri më tani nuk ka pasur një reagim publik nga personi i përmendur apo nga përfaqësuesit e protestës lidhur me këto pretendime.
Postimi i plotë
NJIHUNI ME kontributin mbresëlënës për atdheun të njërit prej 13 flamurtarëve firmëtarë të protestës së bulevardit, ku sorrat dhe korbat i kanë marrë përfundimisht peng flamingot, nën maskën e “Shqipërisë së Re”:
I proceduar:
– 2014 – Rrahje në bashkëpunim, Tiranë
– 2016 – Vjedhje energjie, Tiranë
– 2016 – Rrahje në dëm të një shtetaseje, Tiranë
– 2017 – Rrahje në grup, Durrës
– 2019 – Pjesëmarrje në protestë të paligjshme, pengim qarkullimi I automjeteve, pengim i IMT per prishjen e ndertimit te paligjshëm, Vlorë
– 2020 – Kanosje & plagosje e lehtë, Vlorë
– 2021 – Kanosje ndaj një shtetaseje grua, Vlorë
– 2022 – Dhunë në familje ndaj xhaxhait të tij, Vlorë