Në Spitalin Rajonal të Elbasanit, shërbimi i kimioterapisë vijon të ofrohet çdo ditë, duke u mundësuar pacientëve me sëmundje tumorale trajtim të specializuar më pranë vendbanimit të tyre.
Sipas kryeministrit Edi Rama, zgjerimi i këtij shërbimi është pjesë e investimeve për të përmirësuar aksesin në kujdesin onkologjik. Ai bëri të ditur se së shpejti do të vendosen në funksion edhe 9 njësi të reja të kimioterapisë në spitale të ndryshme të vendit.
Kjo nismë synon të afrojë trajtimin pranë pacientëve, të lehtësojë ndjekjen e terapive dhe njëkohësisht të ulë fluksin e pacientëve në spitalin onkologjik, duke përmirësuar cilësinë dhe aksesin në shërbimet shëndetësore.
”Spitali Rajonal Elbasan, ku shërbimi i kimioterapisë vijon çdo ditë për t’u ofruar pacientëve me sëmundje tumorale trajtim të specializuar sa më pranë vendbanimit të tyre. Së shpejti, 9 njësi të reja të kimioterapisë do të jenë në funksion në të gjithë Shqipërinë, duke zgjeruar aksesin në trajtim, duke e afruar shërbimin me pacientët dhe duke ulur fluksin në spitalin onkologjik”,-shkruan Rama.